စစ်ကိုင်းတိုင်း၊ မုံရွာမြို့နယ်တွင် စစ်ကောင်စီအား ကြီးစွာအထောက်အကူပြုနေသည့် သစ်လုပ်ငန်းရုံးရပ်ဆိုင်းသွားစေရန် ၎င်းရုံးဝင်းရှိ ထရန်စဖော်မာကို မိုင်းဖောက်ခွဲတိုက်ခိုက်ခဲ့ကြောင်း ဒီမိုကရက်တစ်ပြောက်ကျားတပ်ဖွဲ့(အောက်ချင်းတွင်း) DGF(L.C)က သတင်းထုတ်ပြန်သည်။
ယမန်နေ့ (မေလ ၂၂ ရက်) ည ၈ နာရီ ၁၀ မိနစ်အချိန်က မုံရွာမြို့ တည်းခိုရေးတပ် တခရ-၅ အနီး၊ အမှတ် ၇၅ သစ်စက်ရှိ ထရန်စဖော်မာတစ်လုံးကို ဖောက်ခွဲတိုက်ခိုက်ခဲ့ကြောင်း DGF(L.C)က ပြောသည်။
မြန်မာ့သစ်လုပ်ငန်း(မုံရွာ)သည် အာဏာသိမ်းပြီးချိန်ကစ၍ အချိန်ပြည့်လုပ်ငန်းလည်ပတ်လျက်ရှိပြီး စက်ရုံအရာရှိများကလည်း ဝန်ထမ်းများကို CDM မဝင်စေရေး၊ ဖိနှိပ်မှုများ၊ စောင့်ကြည့်ထိန်းချုပ်မှုများ လုပ်ဆောင်လျက်ရှိနေကြောင်း DGF(L.C)က ပြောသည်။
ထို့ကြောင့် စစ်ကောင်စီအတွက် ကျည်ဖိုး၊ ဆီဖိုး၊ လက်နက်ဖိုးများကို ရှာပေးနေသည့် အကြီးဆုံးထောက်တိုင်ကြီးတစ်ခုဖြစ်၍ ထောက်တိုင်လုပ်ငန်း ရပ်ဆိုင်းသွားစေရန် လျှပ်စစ်ထရန်စဖော်မာကို မိုင်းသုံးလုံးဖြင့် ဖောက်ခွဲတိုက်ခိုက်ခဲ့ခြင်းဖြစ်ကြောင်း DGF(L.C)က ပြောသည်။
Public Service Announcement
ပြည်သူများအနေဖြင့် တခရ-၅တပ်နှင့်နီးသော ထိုနေရာဝန်းကျင်အား သွားလာခြင်းမပြုကြရန် ဒီမိုကရက်တစ်ပြောက်ကျားတပ်ဖွဲ့က သတိပေးထားသည်။
ဖြစ်စဥ်နှင့်ပတ်သက်၍ ဒီမိုကရက်တစ်ပြောက်ကျားတပ်ဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်းမရှိသေးပါ။
မိုင်းပေါက်ကွဲမှုဖြစ်ပွားပြီးနောက် တခရ-၅မှ စစ်ကောင်စီတပ်ကား ၃စီးရောက်ရှိလာပြီး ရှင်းလင်းမှုများ ပြုလုပ်သွားကြောင်း ဒေသခံအချို့က ပြောသည်။
အကြမ်းဖက်စစ်တပ်နှင့် တိုက်ပွဲများအပြင်းအထန်ဖြစ်ပွားနေသော မုံရွာခရိုင်အတွင်းတွင် အကြမ်းဖက်စစ်တပ်ထုတ်ကုန်များကိုပါ ရောင်းချခြင်းမပြုကြရန် သတိပေးထားပြီး ယခင်ရက်ပိုင်းကလည်း စစ်တပ်ပိုင်ဘီယာရောင်းချသည့်ဆိုင်များအား ပြည်သူ့ကာကွယ်ရေးအဖွဲ့များက ဝင်ရောက်စစ်ဆေးကာ ဘီယာများအား ဖျက်ဆီးပေးခဲ့သည်။
