စဥ်ကူးမြို့နယ်မှ စစ်​ကောင်စီရာအိမ်မှူးအိမ်မိုးကြိုးပစ်

●ရာအိမ်မှူးသမီး​မွေး​နေ့ပွဲအတွက်လာကူညီ​ပေး​သောအမျိုးသမီး​လေး​ယောက် မိုးကြိုးစက်ကွင်းမိပြီး ၂ ဦး​သေဆုံး

မန္တလေးတိုင်း၊ စဥ့်ကူးမြို့နယ်တွင် စစ်ကောင်စီလက်အောက်၌ တာဝန်ထမ်းဆောင်နေသည့် ရပ်ကွက်ရာအိမ်မှူးအိမ် မိုးကြိုးပစ်ခံရပြီး အမျိုးသမီးလေးယောက်မိုးကြိုးစက်ကွင်းမိကာ နှစ်ဦးသေဆုံးသွားကြောင်း ဒေသခံများက ပြောသည်။

စဥ့်ကူးမြို့နယ်၊ရှောက်ပင်ရိုးကျေးရွာအုပ်စု၊နွယ်ရုံကျေးရွာတွင် မေလ၂၃ရက်နေ့ ညနေ၆နာရီခန့်က မိုးသည်းထန်စွာရွာသွန်းပြီး မိုးကြိုးပစ်ခဲ့ရာ စစ်​ကောင်စီလက်​အောက်တာဝန်ထမ်း​ဆောင်​​နေ​သောရာအိမ်မှုး ထွန်းထွန်းဦးအိမ် မိုးကြိုးပစ်ခံခဲ့ရကြောင်း၊ ရာအိမ်မှူးသမီးမွေးနေ့ပွဲအတွက် လာရောက်ကူညီလုပ်ကိုင်ပေးနေသည့် အမျိုးသမီးလေးယောက်သည် မိုးကြိုးစက်ကွင်းမိပြီး နှစ်ဦးသေဆုံးကာ နှစ်ဦးဒဏ်ရာများ ရရှိခဲ့ကြောင်း ဒေသခံများက ပြောသည်။

“ရာအိမ်မှူးအိမ် က​လေးမွေးနေ့ပွဲ ဝိုင်းကူပေးနေကြရင်း အပစ်ခံရတာ။ သူ့မိသားစုတွေတော့ မထိဘူး”ဟု ဒေသခံတစ်ဦးက ပြောသည်။

Public Service Announcement

ယမန်နေ့ မေလ ၂၄ ရက်နေ့ ညနေ ၅ နာရီဝန်းကျင်ကလည်း စစ်ကိုင်းတိုင်း၊ စစ်ကိုင်းမြို့နယ် ထန်းတောရွာတွင် မိုးသည်းထန်စွာ ရွာသွန်းနေစဥ် ၎င်းကျေးရွာတွင် နေထိုင်သည့် ပျူစောထီးခေါင်းဆောင်တစ်ဦးဖြစ်သူ အုန်းကြီးဆိုသူအား မိုးကြိုးပစ်ခံရပြီး သေဆုံးသွားခဲ့သေးသည်။

အလားတူမေ ၂၄ရက်နေ့လယ်ပိုင်းတွင်လည်းမန္တလေးတိုင်း၊ရမည်းသင်းမြို့နယ်၊ နန်းလုံရွာတွင် မိုးရွာ၍သစ်ပင်အောက် မိုးခိုနေသည့် ငရုတ်စိုက်တောင်သူ ၅ ဦးမိုးကြိုးပစ်ခံရပြီး သေဆုံးသွားခဲ့သည်။

မိုးဦးကာလတွင်မြန်မာနိုင်ငံတွင် မိုးတိမ်​တောင်များအဖြစ်များပြီး မိုးကြိုးပစ်မှုအများဆုံးကာလများထဲမှတစ်ခုဖြစ်​ကြောင်းမိုး​လေဝသပညာရှင်များက​ပြောသည်။