ကန့်ဘလူမြို့နယ် ထန်းတော​ရွာ စစ်ကောင်စီတပ် ညအိပ်တည်းခိုပြီးနောက်ပြန်အထွက်တွင် မီးရှို့ဖျက်ဆီးရာ ဘုန်းကြီးကျောင်းအပါအဝင် နေအိမ်၃ဝကျော် မီးလောင်ပျက်စီး

စစ်ကိုင်းတိုင်း၊ ကန့်ဘလူမြို့နယ် ဧရာဝတီမြစ်ဘေးရှိ ထန်းတော​ကျေးရွာကို အကြမ်းဖက်စစ်ကောင်စီတပ်က ညအိပ်တည်းခိုပြီးနောက် ပြန်အထွက်တွင် မီးရှို့ဖျက်ဆီးခဲ့၍ ဘုန်းကြီးကျောင်းတစ်ကျောင်းနှင့် နေအိမ်၃ဝ ကျော် မီးလောင်ပျက်စီးခဲ့ကြောင်း ဒေသခံများက ပြောသည်။

မေလ ၂၆ ရက် ညနေပိုင်းက ကန့်ဘလူမြို့နယ် မလည်ရွာမှ စစ်​ကြောင်းထိုးလာသည့် ဟုမ္မလင်းအ​ခြေစိုက် ခမရ (၃၆၉)တပ်မှ အင်အား ၁၀၀ဝန်းကျင်ပါ အကြမ်းဖက်စစ်တပ်သည် ထန်း​တောရွာကို ညအိပ်တပ်စွဲပြီး​နောက် ယမန်နေ့( ​မေလ ၂၇ ရက်)နံနက်အ​စောပိုင်းတွင် ရွာကို မီးရှို့ပြီး ထွက်ခွာသွား​ကြောင်း ​ဒေသခံများက ပြောသည်။

ထန်းတောရွာသည် ကန့်ဘလူမြို့နယ် အ​ရှေ့​တောင်ခြမ်း ဧရာဝတီမြစ်ရိုးအနီးတွင်တည်ရှိပြီး အကြမ်းဖက်စစ်တပ်၏ မီးရှို့ဖျက်ဆီးမှုကြောင့် ရွာဦးဘုန်း​ကြီး​ကျောင်းမှ ​ကျောင်း​ဆောင် တစ်ဆောင်နှင့် စည်​တော်စင်အပါအဝင် ထန်း​တောရွာ ရွာလယ်လမ်းမ၏ အ​ရှေ့ဘက်ခြမ်းမှ နေအိမ်၃၅လုံးခန့် ပြာကျပျက်စီးသွားကြောင်း ကန့်လူနယ်မှ Infinity Group က ပြောသည်။

ပြီးခဲ့သည့် မေလ ၂၀ ရက်​က ထန်း​တောရွာအနီးတွင် အကြမ်းဖက်စစ်​ကောင်စီတပ်နှင့် ဒေသတွင်း ပြည်သူ့ကာကွယ်​ရေးပူး​ပေါင်းတပ်များ တိုက်ပွဲဖြစ်ပွားခဲ့​သေးသည်။

Public Service Announcement

ထိုနေ့က အကြမ်းဖက်စစ်တပ်က ဆုတ်ခွာသွားချိန် ထန်း​တောရွာခံ အသက် ၅၀ ​ကျော်အရွယ် အမျိုးသားတစ်ဦးကို ဖမ်းဆီးသွားခဲ့ပြီး ပြန်လွှတ်ပေးခြင်းမရှိသေးကြောင်း ဒေသခံများက ပြောသည်။

စစ်​ကောင်စီတပ်များ ရွာထဲထပ်မံဝင်​ရောက်လာမည်စိုး၍ ထန်း​တောရွာအပါအဝင် အနီးနားရှိ ​လေးတွင်းစဥ်ရွာမှ ပြည်သူ တ​စ်ထောင်​ကျော် ထွက်​ပြေးတိမ်း​ရှောင်​နေရကြောင်း ဒေသခံများက ပြောသည်။

စစ်​ကောင်စီတပ်သည် ယခင်ရက်ပိုင်းအတွင်းကလည်း ကန့်ဘလူခရိုင် ကျွန်းလှမြို့နယ်၊ သဖန်းဆိပ်ဆည် အနောက်ခြမ်းရှိ ရေနံမှော်များအား မီးရှို့ဖျက်ဆီးခဲ့ပြီး နေအိမ် ၄၁ လုံးပါ ပြာကျခဲ့သည်။