မန္တလေးတိုင်း မတ္တရာမြို့နယ်ရှိ စစ်ကောင်စီသတင်းပေး ဒလန်တစ်ဦး ပစ်ခတ်ခံရ၍ သေဆုံးသွားကြောင်း မတ္တရာဒေသခံက ပြောသည်။
“အခု ည ၈နာရီခွဲမှာ ကုလားလို့အမည်ရတဲ့ အသက် ၂၆နှစ်အရွယ်ရှိတဲ့ တစ်ယောက် အုန်းလွတ်ရွာမှာ အပစ်ခံရတယ်။ သေပြီလို့ကြားတယ်”ဟု မတ္တရာနယ်ခံက ယနေ့ (မေလ ၂၉ရက်) ပြောသည်။
ပစ်ခတ်ခံရသည့် ကုလားဆိုသူသည် စစ်ကောင်စီတပ်များ လာရောက်ပါက ဒေသခံပြည်သူ့ကာကွယ်ရေးတပ်ဖွဲ့၏ စခန်းကို လိုက်လံပြသခဲ့သူ ဖြစ်ကြောင်း ၎င်းက ဆိုသည်။
“သူက စခတွေကို လမ်းကြောင်းလိုက်ပြတယ်။ စခန်းက လူတွေက အင်အားမမျှလို့ပြေးကြရင် သူက နောက်ကနေ စားသောက်ရိက္ခာတွေခိုးတယ်။ လူအသုံးအဆောင်ပစ္စည်းတွေခိုးတယ်။ လှည်းနဲ့တိုက်ပြီးတော့ကို ခိုးတာ။ အရှေ့မှာ တစ်ခုမိထားဖူးတယ် ဒီနေ့တော့ ၈နာရီခွဲမှာ အပစ်ခံရတာ”ဟု ဒေသခံက ပြောသည်။
Public Service Announcement
မည်သည့်အဖွဲ့က ပစ်ခတ်သည်ကို မသိရသော်လည်း လက်လုပ်သေနတ်ဖြင့် ပစ်ခတ်ခံခဲ့ရသည်ဟု၎င်းက ဆိုသည်။
လက်ရှိတွင် စစ်ကောင်စီတပ်များသည် မတ္တရာမြို့နယ်အတွင်း စစ်ကြောင်းများ ဝင်ရောက်စီးနင်းမှုများ လုပ်ဆောင်နေရာ ကင်းရွာ၌ စစ်ကောင်စီတပ်အင်အား ၄၀ခန့်ရှိပြီး မတ္တရာ – မန္တလေးလမ်း ထီးတော်မိုး စစ်တပ်၌ ကား ၁၀စီးဖြင့် အင်အား ၂၀၀ ခန့်ရောက်နေကြောင်း၊ ထို့ပြင် ပြင်ဦးလွင် ဘက်မှစစ်ကြောင်းတစ်ကြောင်း အင်အား ၁၀၀ ကျော်ဖြင့် မတ္တရာနယ်သို့ ဝင်ရောက်လာနေသည်ဟု သတင်းရကြောင်း မတ္တရာဒေသခံက ပြောသည်။
