ခင်ဦးနယ်တွင် မီးရှို့ဖျက်ဆီးခံရသည့် ​ကျေးရွာ ၃၀​ကျော်မှ အရပ်သားပြည်သူ တစ်​သောင်း​ကျော် စားနပ်ရိက္ခာနှင့် ​ဆေးဝါးအကူအညီများ လိုအပ်​နေ

ခင်ဦးမြို့နယ်တွင် ကျေးရွာပေါင်း ၃၀ကျော်မှ နေအိမ်ပေါင်း ၁,၃၀၀ကျော်ကို အကြမ်းဖက်စစ်ကောင်စီက မီးရှို့ဖျက်ဆီးခဲ့၍ အရပ်သားပြည်သူ တစ်သောင်းကျော်အတွက် စားနပ်ရိက္ခာနှင့် ဆေးဝါးအကူအညီများလိုအပ်နေသည်။

စစ်ကိုင်းတိုင်းဒေသကြီး ခင်ဦးမြို့နယ်တွင် စစ်ကောင်စီက မီးရှို့ဖျက်ဆီး၍ အရပ်သားနေအိမ်များ မီးလောင်ဆုံး ရှုံးခဲ့သည့်စာရင်းကို ခင်ဦးမြို့နယ်သတင်းမှန်ပြန်ကြား ရေးဌာနက မေလ ၃၀ရက် ညတွင်ထုတ်ပြန်ခဲ့ပြီး စစ်ဘေးနှင့် မီးဘေးသင့်ပြည်သူများကို အနယ်နယ်အရပ်ရပ်မှ ပြည်သူလူထုအနေဖြင့် အကူအညီပေးကြရန်လည်း တိုက်တွန်းထားသည်။

နွေဦးတော်လှန်ရေးအတွက် လက်နက်ဆွဲကိုင်တော်လှန်ခဲ့သည့်အချိန်မှစ၍ လက်ရှိကာလအထိ ခင်ဦးနယ်တွင် ကျေးရွာပေါင်း ၃ဝကျော်မှ ဘာသာရေးအဆောက်အဦအချို့အပါအဝင် နေအိမ်ပေါင်း ၁ ၃၀၀ကျော်ကို စစ်ကောင်စီက မီးရှို့ဖျက်ဆီးခဲ့သည်ဟု ဆိုသည်။

” မီးဘေးသင့်ပြည်သူများဟာ သောင်းချီ ရှိလာပါတယ်။မိုးရာသီရောက်နေပြီ ဖြစ်တာကြောင့် နေစရာခိုင်ခန့်လုံခြုံမှုလိုအပ်လာသလို ဆေးဝါးရိက္ခာကစ ပိုမိုလိုအပ်နေပြီ ဖြစ်ပါတယ်”ဟု ခင်ဦးမြို့နယ်သတင်းမှန်ပြန်ကြားရေးဌာနက ထုတ်ပြန်ထားသည်။

Public Service Announcement

ခင်ဦးမြို့နယ်တွင်စစ်ကောင်စီက ယခုလတ်တလော အကြမ်းဖက်မှုအဖြစ် သရက်ကုန်းရွာရှိ ဘာသာရေးအဆောက်အဦ(ဗလီ)တစ်ခုအပါအဝင် ပြည်သူပိုင်နေအိမ် ၇၅လုံးကို မီးရှို့ဖျက်ဆီးသွားသည်ဟု ထုတ်ပြန်ထားသည်။

သရက်ကုန်းကျေးရွာကို စစ်ကောင်စီက မေလ ၂၉ရက်တွင် မီးရှို့ဖျက်ဆီးခြင်းဖြစ်သည်။

ယနေ့(မေလ ၃၁ရက်)နံနက်ပိုင်းတွင်လည်း ခင်ဦးမြို့နယ် ငှက်ပျောရွာကျေးရွာကို စစ်ကောင်စီက ဝင်ရောက်အကြမ်းဖက်တိုက်ခိုက်နေ၍ ဒေသခံများ ထွက်ပြေးတိမ်းရှောင်နေရသည်။

အရပ်သားပြည်သူများကို ဦးတည်တိုက်ခိုက်နေသည့် စစ်ကောင်စီနှင့် ပျူစောထီးများအား ပြည်သူ့ကာကွယ်ရေးမဟာမိတ်များက မေလ ၂၉ရက်ညနေတွင် မိုင်းဆွဲတိုက်ခိုက်ခဲ့သည်။ ယင်းတိုက်ခိုက်မှုတွင် စစ်ကောင်စီဘက်မှ ခုနှစ်ဦးသေဆုံးခဲ့သည်ဟု ပြည်သူ့ကာကွယ်ရေးတပ်ဖွဲ့များ၏ သတင်းထုတ်ပြန်ရေးစာမျက်နှာဖြစ်သော ခင်ဦးမြို့နယ်သတင်းမှန်ပြန်ကြားရေးဌာနက ထုတ်ပြန်ထားသည်။