မကွေးတိုင်း၊ မြိုင်မြို့နယ်နှင့် ပခုက္ကူနယ်စပ်တွင်စစ်ကောင်စီတပ်ကားနှစ်စီး အားပဒေသာမိုင်းဖြင့် တိုက်ခိုက်ခဲ့ရာထိခိုက်သေဆုံးမှုများရှိကြောင်း မြိုင်မြို့နယ်ပြည်သူ့ကာကွယ်ရေးတပ်ဖွဲ့က သတင်းထုတ်ပြန်သည်။
ယမန်နေ့(မေလ ၃၁ရက်)နံနက် ၁၀နာရီ ၅၅ မိနစ်ခန့်က မြိုင်မြို့နယ်-ပခုက္ကူမြို့နယ်အစပ်ကျောက်စရစ်ကန်နှင့် သစ်ပင်ကြီးရွာကြားတွင် အကြမ်းဖက်စစ်ကောင်စီကားနှစ်စီးအား မိုင်းဆွဲတိုက်ခိုက်ခဲ့ခြင်းဖြစ်သည်။
အကြမ်းဖက်စစ်ကောင်စီ၏ကားနှစ်စီးအားပဒေသာမိုင်းများဖြင့်နေရာ ၂ ရာတွင် တိုက်ခိုက်ခဲ့ရာကား ၁စီးပက်လက်လန်သွားပြီး ၁ စီး ဆိုးရွားစွာပျက်စီးသွားကြောင်း၊ အများအပြား ထိခိုက်သေဆုံးနိုင်ပြီး သတင်းအတိအကျ စုံစမ်းဆဲဖြစ်ကြောင်းမြိုင်မြို့နယ်ပြည်သူ့ကာကွယ်ရေးတပ်ဖွဲ့ကပြောသည်။
ဇွန်လ ၂ ရက်နေ့မှ စတင်ကာ မြိုင်မြို့နယ်အတွင်းဆီဘောက်ဆာယာဥ်များအားလုံခြုံရေးအရ မောင်းနှင်ဖြတ်သန်းခွင့် တားမြစ်ကြောင်း သတင်းထုတ်ပြန်ထားသည်။
မြိုင်မြို့နယ်ပြည်သူ့ကာကွယ်ရေးတပ်ဖွဲ့သည် မေလ ၂၇ ရက်နေ့က မြိုင်မှ ကိုင်းတောမသို့ ထွက်လာသောစစ်ကြောင်းနှင့် ပခုက္ကူမှကိုင်းတောမဘက်သို့လာသောစစ်ကြောင်း အင်အား ၃၀၀ ခန့်ပါသောစစ်ကြောင်း နှစ်ခုပေါင်းဆုံစဥ် ပေပါမိုင်း၂လုံး၊ မိုင်း၇လုံးဖြင့်တိုက်ခိုက်ခဲ့ရာ အကြမ်းဖက်စစ်သား ထိခိုက်သေဆုံးမှုများ ရှိခဲ့သည်။