Foodpanda ကုမ္ပဏီက Riderများနှင့် ညှိနှိုင်းထားသည့် သဘောတူညီချက်များကို အကောင်အထည်မဖော်ပေးဟုဆိုကာ ဇွန်လ ၆ရက်ကစ၍ အလုပ်မဆင်းသပိတ်ပြုလုပ်မည်ဟု Foodpanda Rider များက အသိပေးကြေညာသည်။
Rider များဘက်မှ ခရီးအကွာအဝေးအလိုက် အနိမ့်ဆုံး လုပ်အားခ ၆၇၀ ကျပ်မှစပေးရန် ၊ ဆော့ဖ်ဝဲလ်စနစ်ဖြင့် ထိန်းချုပ်နေသော တင်းကျပ်လွန်းသည့် စည်းကမ်းများကို ပြင်ဆင်ရန် ၊ အလုပ်ချိန်အတွင်း ထိခိုက်နစ်နာမှုရှိပါက ကုမ္ပဏီဘက်မှ ကူညီဆောင်ရွက်ပေးရန် ၊ အလုပ်နားရက် တစ်ပတ်တစ်ရက်အပြည့်အဝပေးရန်စသည့် အချက်များအပါအဝင် အချက်ရှစ်ချက်ကို Rider များက တောင်းဆိုထားသည်။
ထို့ကြောင့် စားသုံးသူများအနေဖြင့် Foodpandaမှ မှာယူခြင်းမပြုရန် ၊ ယင်း Application ကို ဖျက်ရန် နှင့် Application ကို Bad Review ရေးပေးရန်လည်း တောင်းဆိုထားသည်။
ထို့အပြင် Foodpanda နှင့် အလုပ်လုပ်နေသည့် ဆိုင်ရှင်အနေဖြင့်လည်း ဇွန်လ ၆ ရက်ကစတင်၍ Application ကိုပိတ်ထားပေးရန်လည်း မေတ္တာရပ်ခံသည်။
Public Service Announcement
Foodpanda Rider များသည် ကုမ္ပဏီဘက်မှ လုပ်အားခများလျော့ချမှုကြုံရသောကြောင့် မတ်လ ၁၆ ရက်ကလည်း တောင်းဆိုချက် ၇ ချက်နှင့်အတူ အလုပ်မဆင်းသပိတ်ပြုလုပ်ခဲ့သည်။
ထို့ကြောင့် ကုမ္ပဏီဘက်မှ တာဝန်ရှိသူများက ညှိနှိုင်းမှုများပြုလုပ်ခဲ့ပြီး Rider များ၏ တောင်းဆိုချက်ထဲမှ အချို့အချက်များကို ဆောင်ရွက်ပေးမည်ဟု နှုတ်ကတိပြုခဲ့သော်လည်း လက်ရှိအချိန်အထိ အကောင်အထည်မဖော်သေးကြောင်း Riderများ၏ ထုတ်ပြန်ချက်၌ ဖော်ပြထားသည်။
