သံတောင်မြို့မှာ တပ်စွဲထားတဲ့ စစ်ကောင်စီတပ်စခန်းတစ်ခုကို ဒီကနေ့မနက်ပိုင်းက သံတောင်ဒေသခံကာကွယ်ရေးတပ်ဖွဲ့က စနိုက်ပါသေနတ်နဲ့သွားရောက်ပစ်ခတ်ခဲ့လို့ စစ်ကောင်စီတပ်ဖွဲ့ဝင်တစ်ဦး သေဆုံးသွားခဲ့တယ်လို့ ဒေသတွင်းသတင်းရင်းမြစ်ထံကနေ သိရပါတယ်။
ဒီကနေ့ ဇွန် ၇ ရက် မနက် ၈ နာရီအချိန်ခန့်က သံတောင်(၁၃)မိုင်-သံတောင်ကြီးလမ်းမှာရှိတဲ့ စစ်ကောင်စီတပ်စခန်းတစ်ခုကို သံတောင်ဒေသကာကွယ်ရေးတပ်ဖွဲ့က စနိုက်ပါနဲ့ သွားရောက်ပစ်ခတ်ခဲ့ပြီး စစ်ကောင်စီတပ်ဘက်က လက်နက်ငယ်တွေနဲ့ ပြန်လည်ပစ်ခတ်ခဲ့တယ်လို့ တောအူးကရင်သတင်းစဉ်မှာ ဖော်ပြထားပါတယ်။
သေဆုံးသွားတဲ့ စစ်ကောင်စီတပ်ဖွဲ့ဝင်ဟာ ဒုတပ်ရင်းမှူး ဒါမှမဟုတ် ဒုတပ်ခွဲမှူးအဆင့်ရှိတဲ့ အရာရှိတစ်ီဥးဖြစ်နိုင်တယ်လို့ သံတောင်ဒေသကာကွယ်ရေးတပ်ဖွဲ့က ဆိုထားပါတယ်။
ဒီလိုပစ်ခတ်မှုတွေဖြစ်ပွားပြီးတဲ့နောက်မှာ စစ်ကောင်စီတပ်က ရပ်ရွာတွေအတွင်း လှည့်လည်စစ်ဆေးတာတွေ၊ သေနတ်ပစ်ဖောက်တာတွေ ပြုလုပ်လာနိုင်တာကြောင့် သတိရှိစွာနေထိုင်သွားလာကြဖို့ သံတောင်ဒေသကာကွယ်ရေးတပ်ဖွဲ့က အသိပေးထားပါသေးတယ်။
“မနက်အစောသေနတ်သံကြားတယ်။ စစ်တပ်ကုန်းက ပစ်ခတ်ခံရတာပါ။ စစ်သားတစ်ဦး ပစ်ခတ်ခံရလို့ သေသွားပြီတဲ့” လို့ ဒေသခံတစ်ဦးက တောအူးကရင်သတင်းစဉ်ကို ပြောကြားပါတယ်။
ကေအဲန်ယူ တောင်ငူခရိုင် တပ်ရင်း(၄)ထိန်းချုပ်နယ်မြေရှိ စစ်ကောင်စီတပ်စခန်းတွေဟာ လက်နက်ငယ်နဲ့ပစ်ခတ်ခံရလို့ မေလတလတာအတွင်းမှာ စစ်ကောင်စီတပ်ဖွဲ့ဝင် ၁၆ ဦး သေဆုံးခဲ့ပြီး ၄ ဦးဒဏ်ရာရရှိသွားခဲ့တယ်လို့ တောအူးကရင်သတင်းစဉ်ဆီကနေ သိရပါတယ်။