(၁၂)ကြိမ်မြောက် ကမ္ဘာ့ကုန်သွယ်ရေးအဖွဲ့ဝန်ကြီးအဆင့်အစည်းအဝေး စစ်ကောင်စီ တက်ရောက်ခွင့်မရပြန်

(၁၂)ကြိမ်မြောက် ကမ္ဘာ့ကုန်သွယ်ရေးအဖွဲ့ဝန်ကြီးအဆင့်အစည်းအဝေးကို စစ်ကောင်စီကိုယ်စားလှယ်အဖွဲ့အား တက်ရောက်ခွင့်မပြုကြောင်း World Trade Organization (WTO) က အမျိုးသားညီညွတ်ရေးအစိုးရ(NUG)ထံ အကြောင်းကြားခဲ့သည်။

အဆိုပါ (၁၂)ကြိမ်မြောက် ဝန်ကြီးအဆင့်အစည်းအဝေးကို ဂျနီဗာမြို့တွင် ဇွန်လ၁၂ ရက်မှ ၁၅ ရက်အထိ ကျင်းပမည်ဖြစ်ပြီး စစ်ကောင်စီသည် မြန်မာနိုင်ငံကိုယ်စားပြုအစိုးရမဟုတ်သောကြောင့် ကိုယ်စားပြုတက်ခွင့်မရခြင်းဖြစ်သည်ဟု WTOက ဆိုသည်။

အဆိုပါအစည်းအဝေးကို စစ်ကောင်စီဘက်မှ ကိုယ်စားလှယ် သုံးဦးတက်ရောက်ရန် တင်ပြခဲ့သော်လည်း NUGဘက်မှ ကန့်ကွက်ခဲ့ပြီးနောက် စစ်ကောင်စီကိုယ်စားလှယ်ကို တက်ရောက်ခွင့်မပြုခဲ့ရန် WTOက ဆုံးဖြတ်ခဲ့ခြင်းဖြစ်သည်။

WTO၏ ဝန်ကြီးအဆင့်အစည်းအ​ဝေးကို စစ်​ကောင်စီဝန်ကြီး ​ဒေါက်တာပွင့်ဆန်း၊ အမြဲတမ်းအတွင်းဝန်ဦးမင်းမင်နှင့် ညွန့်ကြား​ရေးမှူးဦးညီညီ​အောင်တို့ တက်​ရောက်ရန် စစ်ကောင်စီက စာရင်းသွင်းထားခြင်းဖြစ်သည်။

Public Service Announcement

အဆိုပါ WTO ဝန်ကြီးအဆင့်အစည်းအဝေးသည် ၂၀၂၁ နိုဝင်ဘာ ၃၀ ရက်မှ ဒီဇင်ဘာ ၃ ရက်အထိ ကျင်းပရန်စီစဉ်ခဲ့သော်လည်း ကိုဗစ်-၁၉ ကပ်ရောဂါအခြေအနေများကြောင့် နှောင့်နှေးခဲ့ရခြင်းဖြစ်သည်။

စစ်တပ်အာဏာသိမ်းပြီးနောက် ယမန့်နှစ် WTOအစည်းအဝေးကိုလည်း စစ်ကောင်စီကိုယ်စားလှယ်ဘက်မှ စစ်ကောင်စီဝန်ကြီး ဒေါက်တာပွင့်ဆန်းတက်ရောက်ရန် စာရင်းပေးခဲ့သော်လည်း WTOဘက်က ပထမအကြိမ်ပယ်ချခဲ့သည်။ ယခုပယ်ချမှုသည် ဒုတိယအကြိမ်ဖြစ်သည်။

ယမန်နှစ် စက်တင်ဘာက ကုလသမဂ္ဂအထွေထွေညီလာခံတွင် စစ်ကောင်စီကိုယ်စားလှယ်ကို တက်ရောက်ခွင့်မပြုကြောင်း ကုလသမဂ္ဂကဆုံးဖြတ်ခဲ့ခြင်းဖြစ်သည်။ စစ်ကောင်စီသည် ကုလသမဂ္ဂအပါအဝင် နိုင်ငံတကာအစည်းအဝေးများတွင် နိုင်ငံကိုယ်စားပြုခွင့်မှာ လက်ရှိအချိန်ထိ မရရှိသေးပေ။