စစ်ကောင်စီ၏ ၂၀၂၃ ရွေးကောက်ပွဲသည် ဒီမိုကရေစီအရွေ့လုံး၀မဟုတ်ဘဲ စစ်အာဏာရှင်စနစ် အသွင်သဏ္ဍန်ပြောင်းခြင်းသာဖြစ်ကြောင်း အဖွဲ့အစည်း ၃၃ဖွဲ့က ထုတ်ပြန်လိုက်သည်။
စစ်ကောင်စီ၏ရွေးကောက်ပွဲကို အသိအမှတ်ပြုလိုက်ပါက ၂၀၀၈ ဖွဲ့စည်းပုံအခြေခံဥပဒေအောက် ပြန်ရောက်သွားပြီး စစ်အာဏာရှင်စနစ်ကို ပိုမိုခိုင်မြဲသွားစေမည်ဖြစ်ကြောင်း တော်လှန်ရေးအင်အားစုများ၏ ထုတ်ပြန်ချက်၌ ဖော်ပြသည်။
“အရေးကြီးသည့် အဆစ်အချိုးကာလဖြစ်သည့်အတွက် မိမိတို့ တော်လှန်ရေးအင်အားစုများအတွင်း ညီညွတ်ရေးကို အစွမ်းကုန်ထိန်းသိမ်းပြီး စစ်ကောင်စီ၏ လှည့်စားမှုများအကြား ယိမ်းယိုင်မှုမရှိကြစေရန် အချင်းချင်းပို၍ သတိပေးကြ၊ လက်တွဲကြရမည်ဖြစ်သည်”ဟု အဖွဲ့အစည်း ၃၃ဖွဲ့၏ ကြေညာချက်၌ ဖော်ပြသည်။
နွေဦးတော်လှန်ရေးအောင်ပွဲကို လူထုအားဖြင့်သာ၊ လူထု၏ နည်းသဏ္ဍန်ပေါင်းစုံသော တိုက်ပွဲ များဖြင့်သာ အရယူနိုင်မည်ဟု အထက်ပါတော်လှန်ရေးအင်အားစုများက အလေးအနက် ယုံကြည်ကြောင်းနှင့် စစ်ကောင်စီ ၏ ထွက်ပေါက်မှန်သမျှကို အခိုင်အမာပိတ်ဆို့သွားကြရန် တိုက်တွန်းသည်။
ယနေ့တိုက်ပွဲဝင်အင်အားစုအသီးသီး၏ ရည်မှန်းချက်သည် စစ်အာဏာရှင်စနစ်အကုန်အစင်ဖျက်သိမ်းရေး၊ ၂၀၀၈ ဖွဲ့စည်းပုံအခြေခံဥပဒေအပြီးအပိုင်ဖျက်သိမ်းရေးနှင့်ဖက်ဒရယ်ဒီမိုကရေစီ ပြည်ထောင်စုတည်ဆောက်ရေးတို့ဖြစ်သည်။
၂၀၂၃ ရွေးကောက်ပွဲသည် စစ်ကောင်စီအတွက် အထက်ပါရည်မှန်းချက် ၃ရပ်လုံးက ရှောင်ထွက်ရန် ထွက်ပေါက်ဖြစ်သည်ဟု တော်လှန်ရေးအင်အားစုများက သုံးသပ်သည်။