အကြမ်းဖက်စစ်ကောင်စီက သပိတ်လှုပ်ရှားမှုများအတွက် အလှူငွေပေးမည့်အသွင်ယူကာ သပိတ်အဖွဲ့များကို ထောင်ချောက်ဆင်ဖမ်းဆီးမှုများပြုလုပ်နေ၍ သတိထားကြရန် သပိတ်ကော်မတီဝင်များက တိုက်တွန်းပြောကြားသည်။
“ကျွန်တော်တို့ဘာလိုလဲ ဘာအားနည်းချက်ရှိလဲ ဘာနဲ့မျှားခေါ်ရင်ပါနိုင်သလဲ ဆိုတာသူတို့ကောင်းကောင်းနပ်ပါတယ်။ ဒီတစ်ခါက ငါးစာပဲမြင်ပြီး ငါးမျှားချိတ်မမြင်မိလိုက်ပဲ ဆုံးရှုံးလိုက်ရတာပါ။”ဟု စမ်းချောင်းမြို့နယ်သပိတ်ကော်မတီနှင့် နီးစပ်သူတစ်ဦးက ပြောသည်။
အကြမ်းဖက်စစ်ကောင်စီက သပိတ်အဖွဲ့များထံ အလှူငွေထည့်သည့် ပုံစံဖြင့်အသွင်ယူကာ ယုံကြည်မှုတည်ဆောက်ခြင်းဖြစ်ပြီး ပမာဏများများ လှူဒါန်းမည်ဟု အကြောင်းပြကာ လူချင်းတွေ့ဆုံလိုကြောင်း ပြောဆိုပြီး ဖမ်းဆီးခြင်းဖြစ်သည်ဟု ၎င်းက ဆိုသည်။
သပိတ်အဖွဲ့ဝင်များ ဖမ်းဆီးခံရသည့် သတင်းကိုလည်း ထုတ်ပြန်ခြင်းမရှိဘဲ အချို့ဖမ်းဆီးခံရသူများကို ပုံမှန်အတိုင်း နေထိုင်ခိုင်းကာ ဆက်စပ်သူများကို လိုက်လံဖမ်းဆီးခြင်းဖြစ်သည်ဟု ၎င်းက ဆိုသည်။
Public Service Announcement
အလှူငွေကို ပြင်ပတွင်လှူမည်ဟု ချိန်းဆိုကာ ဖမ်းဆီးမှုများရှိသောကြောင့် ပြင်ပတွင်တွေ့ဆုံ၍ အလှူငွေလက်ခံခြင်းထက် Wave၊ KBZ Pay တို့ဖြင့်သာလက်ခံကြရန် Clean Yangon မှ ကိုဇေယျာထွန်းက အကြံပြုထားသည်။
ဇွန်လ ၁၃ရက်နှင့် ၁၄ရက်တို့တွင် အကြမ်းဖက်စစ်ကောင်စီက စမ်းချောင်း ၊ ကြည့်မြင်တိုင် ၊ လှိုင် ၊ ကမာရွတ် ၊ တာမွေ ၊ လသာ ၊ လမ်းမတော် ၊ ပုဇွန်တောင် ၊ မြောက်ဥက္ကလာပ စသည့် မြို့နယ်များ၌ ဧည့်စာရင်းအကြောင်းပြကာ စစ်ဆေးမှုများပြုလုပ်နေကြောင်း မြို့နယ်အသီးသီး ၏ ဖေ့စ်ဘွတ်ခ်စာမျက်နှာများ၌ အသိပေးထားကြသည်။
“NUG ဟာ သပိတ်တပ်သားတွေအပေါ်အတော်တာဝန်ပျက်ကွက်ပါတယ်။ သပိတ်တပ်သားတွေဟာ တကယ်တော့ အပယ်ခံသဘောကိုဖြစ်နေတာပါ။ ဆီစျေးကြီးလာတာနဲ့အမျှ သပိတ်တစ်ခါခါထွက်ဖို့စားရိတ်စားခအပြင် လုံခြုံရေးအပိုင်းတွက်အများကြီးကုန်ကျလာပါတယ်။ သပိတ်ဟာ စစ်အာဏာရှင်ကိုနောက်ဆုံးချိန်ထိတော်လှန်နေဆဲဖြစ်ကြောင်း စည်တီးမောင်းခတ်ပေးနေတဲ့သဘောအသွင်တောင်တာမို့ သပိတ်ကိုမလိုအပ်ဘူးလို့ထင်တဲ့အတွေးဟာအင်မတန်မှားယွင်းပါတယ်။ သပိတ်တပ်သားတွေရဲ့ကျေးဇူးကြီးမားပါတယ်။”ဟု စမ်းချောင်းမြို့နယ်သပိတ်ကော်မတီ နှင့် နီးစပ်သူက ၎င်း၏ အမြင်ကိုပြောသည်။
ထို့ပြင်သပိတ်အဖွဲ့များအနေဖြင့် အချင်းချင်း စစ်ဆေးမှုများပြုလုပ်၍ အယုံမလွယ်ကြရန်လည်း ၎င်းက အကြံပြုသည်။
ရန်ကုန်မြို့၌ စစ်အာဏာရှင်ဆန့်ကျင်ရေး ပျောက်ကြားသပိတ်ဖော်ဆောင်နေသည့် လူငယ် ၃၀ ကျော်ကို ဇွန်လ၁၃ ရက်ညက အကြမ်းဖက်စစ်ကောင်စီ၏ အဓမ္မ ဖမ်းဆီးခြင်းခံခဲ့ရကြောင်း တော်လှန်ရေးအင်အားစုများ၏ အိုးဝေလူမှူကွန်ရက်စာမျက်နှာက ထုတ်ပြန်ထားသည်။
