စစ်ကိုင်းတိုင်း ယင်းမာပင်မြို့နယ်အတွင်း တပ်စွဲထားသည့် အကြမ်းဖက်စစ်ကောင်စီတပ်ကို ပြည်သူ့ကာကွယ်ရေးမဟာမိတ်ဖွဲ့များက တိုက်ခိုက်ပြီးနောက် အရပ်သားနေအိမ်များကို စစ်ကောင်စီက မီးရှို့ဖျက်ဆီးနေသည်။
ယင်းမာပင်မြို့နယ် စည်ပင်ရုံးအပါအဝင် စစ်ကောင်စီတပ်စွဲထားသည့် နေရာအချို့အား ယင်းမာပင်မြို့နှင့် ဆားလင်းကြီးမြို့အခြေစိုက် ပြည်သူ့ကာကွယ် ရေးအဖွဲ့များက ဇွန်လ၂၀ရက် ညတွင် တိုက်ခိုက်ခဲ့ခြင်း ဖြစ်သည်။
” ညကတော့ ကျွန်တော်တို့ဘက်က လိုက်တိုက်တာ။ ကျွန်တော်တို့ပစ်တဲ့လက်နက်ကြီးမှန်လို့ စစ်ကောင်စီတပ်ဘက်က ထိခိုက်တာရှိတယ်။ အရေအတွက်ကို မသိရဘူး။ ပြည်သူ့ရဲဘော်ဘက်ကတော့ နှစ်ဦး မစိုးရိမ်ရဒဏ်ရာရတယ်”ဟု မြောက်ယမားပြည်သူ့ကာကွယ်ရေးတပ်ဖွဲ့မှ ပြန်ကြားရေးတာဝန်ခံက ပြောသည်။
ဇွန်လ၂၀ရက်ညတွင် တိုက်ခိုက်ခံရပြီးနောက် ယနေ့(ဇွန် ၂၁ရက်)တွင် နေအိမ် ၁၀၀ခန့်ရှိ ဆားလင်းကြီးမြို့နယ် မိုးကြိုးပြင်မြောက်ရွာကို စစ်ကောင်စီက ရွာလုံးကျွတ်မီးရှို့ဖျက်ဆီးသွားသည်ဟု ဒေသခံများက ပြောသည်။
Public Service Announcement
“ဇွန်၂၀ရက်မနက်က ကောင့်ဆင့်ရွာကို စစ်ကောင်စီက ဝင်မွှေတယ်။ အိမ် ၂၀လောက် မီးရှို့ခံရတယ်။ အရပ်သားတစ်ယောက် အသတ်ခံရတယ်။ ကောင်းဆင့်ရွာကို မီးရှို့လို့ ပြည်သူ့ကာကွယ် ရေးရဲဘော်တွေက ညဘက်မှာ စစ်ကောင်စီတပ်ကို တိုက်တာ။ မနက်ကျတော့ မိုးကြိုးပြင်မြောက်ရွာကို ဝင်မွှေပြန်တယ်”ဟု ပြည်သူ့ကာကွယ်ရေးရဲဘော်တစ်ဦးက ပြောသည်။
ဇွန်လ၂၀ရက်ညက တိုက်ခိုက်မှုကို မြောက်ယမားပြည်သူ့ကာကွယ်ရေးတပ်ဖွဲ့အပါအဝင် ယင်းမာပင်နှင့် ဆားလင်းကြီးမြို့မှ ပြည်သူ့ကာကွယ်ရေးအဖွဲ့များက ပူးပေါင်းတိုက်ခိုက်ခဲ့ခြင်းဖြစ်သည်။
