ကျိုက်ထိုမြို့နယ်၊ အင်္ဂဘိုကျေးရွာ ဘုရားလေးလမ်းခွဲကြား၌ စစ်ကောင်စီယာဥ်တန်းကို မိုင်းဆွဲပစ်ခတ်တိုက်ခိုက်ခဲ့ကြောင်း သထုံခရိုင်ပြည်သူ့ကာကွယ်ရေးတပ်မတော် တပ်ရင်း(၃)က ထုတ်ပြန်သည်။
ယနေ့(ဇွန် ၂၅ ရက်) နံနက် ၉နာရီ မိနစ်၄၀ခန့်က KNU/KNLA နှင့် ပြည်သူ့ကာကွယ်ရေးတပ်မတော်တို့က ပူးပေါင်း၍ စစ်ကောင်စီယာဥ်တန်းကို တိုက်ခိုက်ခဲ့သည်ဟု ဆိုသည်။
ဝေါမြို့နယ်ဘက်မှ ကျိုက်ထိုမြို့သို့ လာသည့် စစ်ကောင်စီယာဥ်တန်းတွင် ပွိုင့်ကား တစ်စီး၊ စစ်ကား နှစ်စီး နှင့် အိမ်စီးကားတစ်စီး ပါဝင်ကြောင်း ကျိုက်ထိုပြည်သူ့ကာကွယ်ရေးပူးပေါင်းရေးအဖွဲ့ဝင်တစ်ဦးက အသိပေးသည်။
“သတင်းကြိုရလို့စောင့်တိုက်တာ။ပဒေသာမိုင်း၊ RPG ၊ လက်နက်ကြီးတွေနဲ့ တရဆက် ပစ်လိုက်တာ။ တော်တော်အထိနာမယ်။ သူတို့ကားက နည်းတော့ စိတ်ကြိုက် ပစ်လိုက်ရတယ်။ သူတို့ပြန်ပစ်တော့ ကျွန်တော်တို့ ဆုတ်ခွာလာလိုက်တယ် “ဟု ၎င်းက ပြောသည်။
Public Service Announcement
သို့သော်တိုက်ခိုက်မှုဖြစ်စဥ်တွင် စစ်ကောင်စီဘက်မှ ထိခိုက်ကျဆုံးမှု မသိရှိရသေးပေ။
ထို့အပြင် ပြည်သူ့ကာကွယ်ရေးတပ်မတော်နှင့် KNU/KNLA ပူးပေါင်းတပ်ဖွဲ့များ အထိခိုက်မရှိဆုတ်ခွာနိုင်ခဲ့ကြောင်းထုတ်ပြန်ချက်၌ဖော်ပြသည်။
