စစ်​ကောင်စီတပ်အထိနာခဲ့​​သောဗန်း​မောက်တိုက်ပွဲမှအ​လောင်းများကို​စစ်တပ်ကဒေသခံအချို့ ​ခေါ်ယူ၍သဂြိုဟ်

ဗန်း​မောက်မြို့နယ်တွင် စစ်​ကောင်စီတပ်ကို ကချင်လွတ်လပ်​ရေးတပ်မ​​တော်(KIA)နှင့် ကသာခရိုင် တပ်ရင်းများဖြစ်သည့် ဗန်း​​မောက်-PDF ၊အင်း​တော်- PDFတို့ကစစ်​ကောင်စီတပ်အားဇွန် ၂၃ ရက်တွင်တိုက်ခိုက်ခဲ့ရာ ​သေဆုံးခဲ့​​သောစစ်သားအ​လောင်းများကို​ဒေသခံပြည်သူအချို့ ​ခေါ်ယူ၍ သဂြိုဟ်သွား​ကြောင်းအင်းတော်တော်လှန်ရေးအင်အားစု(IR)က ထုတ်ပြန်သည်။

ဇွန် ၂၃ ရက်နေ့ညနေ ၅ နာရီခန့်က မော်တိတ်ဒေသ မံထုံ၊ တောင်ကြီးဘက်သို့ စစ်ကြောင်းထိုးလာသော စစ်ကောင်စီတပ်မှ အင်အား ၁၅၀ ခန့်ကို KIA + ကသာခရိုင်တပ်ရင်း(၂) ဖြစ်​သော အင်း​တော်နှင့် ဗန်း​မောက်PDFမျာကနှစ်ဖက်ညှပ် တိုက်ခိုက်ခဲ့ရာ ၄ နာရီကြာ တိုက်ပွဲဖြစ်ပွားခဲ့ပြီး စစ်​ကောင်စီတပ်သား အနည်းဆုံး ၃၀ ခန့်​သေဆုံးခဲ့​ကြောင်း ပြည်သူ့ကာကွယ်​ရေးတပ်ဖွဲ့ဝင်များက​ပြောသည်။

“စခတွေတော့ အကျဆုံးများတယ်။ ပထမရေထားတာ ၂၆ ယောက်အတိအကျပါ။ နောက် ကျတဲ့ဟာတော့ မသိရတော့ဘူး။အနည်းဆုံး၃၀လောက်တော့ရှိမယ်ဗျ။ကျည်မလောက်
လို့နောက်ဆုတ်ခဲ့ရတာ”ဟုအင်းတော်တော်လှန်ရေးအင်အားစု(IR)မှ ရဲဘော်တစ်ဦးကပြောသည်။

“ရန်သူ(စစ်ကောင်စီတပ်)တပ်က အင်အား ဘယ်လောက်နဲ့ ဆင်းလာတယ်ဆိုကို သတင်း အတိအကျ ရတာနဲ့ ဗျူဟာကောင်းကောင်းချပြီး နှစ်ဖွဲ့ ညှပ်တိုက်တာ။သေတာကမျက်မြင် အရ ၃၀ လောက်ရှိတယ်။ဒဏ်ရာရတဲ့သူက ပိုများတယ်။သူတို့ (စစ်​ကောင်စီတပ်)ဘက် အကျ များတော့ မနေ့က လက်နက်ကြီး ကြီးပဲ အလုံး ၅၀ ကျော်လောက်သုံးတယ်။ကျွန်တော်တို့လက်နက်ကောက်ဖို့မစောင့်တော့ဘဲအန္တရာယ်ကင်းအောင်ပဲဆုတ်လိုက်တယ်”ဟု အင်းတော် PDF တပ်ဖွဲ့ဝင်တစ်ဦးကလည်းPeople’s Spring သို့ ဇွန် ၂၄ ရက်တွင်ပြောသည်။

Public Service Announcement

သေဆုံးစစ်သားရုပ်အလောင်းများကို စစ်ကောင်စီဘက်မှ ဇွန် ၂၃ ရက်ညပိုင်းတွင် ပတ်ဝန်းကျင်ကိုလက် နက်ကြီးဖြင့်ရမ်းထုပြီး အလောင်းသွားကောက်ကာ ဒေသခံပြည်သူတစ်ချို့ကိုခေါ်ပြီး သဂြိုလ်လိုက်ကြောင်း အင်းတော်တော်လှန်ရေးအင်အားစု(IR)ကယ​နေ့ (ဇွန် ၂၅)တွင်ထုတ်ပြန်သည်။

ထိုတိုက်ပွဲတွင် KIA + ရင်း (၂)ကာကွယ်ရေးပူးပေါင်းတပ်များဘက်မှ စစ်ကောင်စီတပ်ကပစ်ခတ်သည့်လက်နက်ကြီးထိပြီး ရဲဘော်နှစ်ဦးဒဏ်ရာရခဲ့သော်လည်း မစိုးရိမ်ရကြောင်း အသိပေးသည်။

တိုက်ပွဲဖြစ်ပွားပြီးနောက်တစ်ရက် ဇွန် ၂၄ တွင် စစ်ကောင်စီတပ်မှ မင်းကုန်းရွာထဲဝင်မွှေကာ အိမ်များကိုဖျက်စီးသွားပြီး စျေးဆိုင်များမှပစ္စည်းများ၊ နေအိမ်များရှိ ပစ္စည်းများကို အိတ်များဖြင့် ထည့်ယူသွားကြသည်ဟု ဆိုသည်။

မြို့နယ်တွင်း ထိတွေ့တိုက်ပွဲသတင်းများကို အချိန်မီမထုတ်ပြန်နိုင်ဘဲ ယခုကဲ့သို့နောက်ကျမှ ထုတ်ပြန်ရခြင်းမှာ မြို့နယ်တွင်းရှိဒေသခံပြည်သူများ၊ တော်လှန်ရေးရဲဘော်များ ဘေးကင်းလုံခြုံမှုရှိသည့် အ​ခေနေရောက်မှ ထုတ်ပြန်ရခြင်းဖြစ်ကြောင်း IR က အသိပေးထားသည်။

တိုက်ပွဲဖြစ်ပြီး​​နောက်အင်းတော် – ဗန်းမောက် ကားလမ်းကို ဇွန်လ၂၄ရက်နံနက်မှ ဇွန်လ ၂၅ရက် နံနက် ၆နာရီအထိ သုံးဘီး၊ ဆိုင်ကယ်၊ ကား စသည့် မည်သည့် ယာဉ်မှဖြတ်သန်းခြင်းမပြုရန် ဒေသခံပြည်သူ့ကာကွယ်ရေးတပ်ဖွဲ့မှ အရေးပေါ် ထုတ်ပြန်ကြေညာခဲ့သည်။