ထီးလင်းမြို့တွင် စစ်ကောင်စီလက်အောက်ခံ စစ်သားနှင့်ရဲများအချင်းများပြီး နှစ်ဖက်တင်းမာနေ

▪️စစ်တပ်က လက်နက်ကြီးဖြင့် ရမ်းပစ်၍ Non-CDM ဝန်ထမ်းသားအမိနှစ်ဦးအပါအဝင် မိသားစုဝင်သုံးဦးလုံးသေဆုံး

ထီးလင်းမြို့သို့ရောက်ရှိနေသော စစ်ကောင်စီ လက် အောက်ခံ စစ်တပ်နှင့် ရဲများ နှစ်ဖက်အချင်းများပြီး အခြေအနေတင်းမာနေကြောင်း YDF – Htilinက ယနေ့(ဇွန် ၂၆)ထုတ်ပြန်သည်။

ဒေသခံသတင်းရင်းမြစ်တစ်ဦး၏ပြောဆိုမှုအရ ယနေ့ညနေ ၅ နာရီခန့်တွင် မူးယစ်သောက်စားထားသော စစ်သားနှင့် ရဲများသည် ကာရာအိုကေသွားဆိုမည့်ကိစ္စဖြင့် စကားများခဲ့ကြသည်ဟု ဆိုသည်။

ထို့နောက် စစ်သားများက ထီးလင်းမြောက်ပိုင်းရဲစခန်းဝင်းဘက်သို့ လက်နက်ကြီးများဖြင့် ရမ်းသမ်းပစ်ခတ်ခဲ့ရာ နေအိမ်တစ်လုံးပေါ်သို့ကျရောက်ပေါက်ကွဲပြီး Non-CDM ဝန်ထမ်းသားအမိဖြစ်သော မိခင်ဖြစ်သူ ထွေအုပ်စာရေးနှင့် သမီးဖြစ်သူ တိမွေးကုဆရာမတို့ သေဆုံးသွားကြောင်း YDF – Htinlin က ထုတ်ပြန်သည်။

ထို့အပြင် အဆိုပါနေအိမ်မှ ဖခင်ဖြစ်သူ ပြည်ခိုင်ဖြိုးပါတီဝင် ဦးအောင်းသန်းဝင်းဆိုသူမှာလည်း ပြင်းထန်ဒဏ်ရာရရှိသောကြောင့် ဆေးရုံပို့ကုသစဥ် ယနေ့ညပိုင်း၌ တေးရုံ၌ပင်ထပ်မံသေဆုံးသွားသည်ဟု ဆက်လက် ဖော်ပြသည်။

Public Service Announcement

ထီးလင်းမြို့ပေါ်ရှိ စစ်သားနှင့် ရဲများ အထက်ပါအတိုင်း အချင်းများကြပြီးနောက် ထီးလင်းမြောက်ပိုင်းရဲစခန်းမှရဲများကို စစ်သားအချို့က ဆဲဆိုကြိမ်းမောင်းခြင်း၊ ရိုက်နှက်ခြင်းများရှိခဲ့ကြောင်း YDF – Htilinက ပြောသည်။

“စစ်ခွေးတွေက သူတို့မကျေနပ်တာရှိလို့ ရဲခွေးတွေကိုဆဲဆိုပြီး တစ်ဖက်သတ်ရိုက်နှက်တာမျိုးပါခင်ဗျ”ဟု YDF-Htilin မှ တော်လှန်ရေးရဲဘော်တစ်ဦးက ပြောသည်။

ထို့နောက် စစ်ကောင်စီတပ်သားများပြန်သွားချိန်တွင် ရဲများဘက်မှ စခန်းတွင်းလူစုကာ ဘန်ကာများတွင် အသင့်နေရာယူထားကြပြီး စစ်တပ်ဘက်မှလည်း ယနေ့ည ၈ နာရီကျော်သည်အထိ လက်နက်ကြီး၊ လက်နက်ငယ်များဖြင့် မြို့ပေါ်တွင် ရမ်းသမ်းပစ်ခတ်နေကြောင်း ၎င်းက ဆက်ပြောသည်။

ထီးလင်းမြို့သို့ရောက်နေသော စစ်သားများမှာ YDF-Htilin ၏တပ်ဖွဲ့ဝတ်စုံများ ဝတ်ဆင်ကာ မြို့ပေါ်အပါအဝင် ကျေးရွာအချို့သို့ PDF အသွင်ဖြင့် ဝင်ရောက်သောင်းကျန်းခြင်းများရှိနေပြီး နေအိမ်များအား ဖျက်ဆီးခြင်း၊ တန်းဖိုးရှိပစ္စည်းများခိုးယူခြင်းတို့ကို ကျူးလွန်နေကြောင်း အသိပေးသည်။

သို့သော် လက်ရှိအခြေအနေမှာ စစ်ကောင်စီလက် အောက်ခံ လက်နက်ကိုင်တပ်ဖွဲ့အချင်းချင်း နှစ်ဖက်ဆက်ဆံရေးအဆင်မပြေဘဲ တင်းမားသည့်အခြေအနေတွင်ရှိ၍ ပစ်ခတ်တိုက် ခိုက်မှုများရှိလာနိုင်သောကြောင့် ပြည်သူများအ​နေဖြင့် ကျည်ကွယ်၊ မျက်ကွယ်တွင် နေထိုင်ကြရန် တော်လှန်ရေးတပ်ဖွဲ့များက သတိပေးထား သည်။

ထို့အပြင် စစ်ကောင်စီလက်အောက်ခံ ရဲတပ်ဖွဲ့ဝင်များအနေဖြင့်လည်း စစ်သားများ၏ အပေါ်စီးမှ ရိုင်းစိုင်းစွာဆက်ဆံနေမှုများကြောင့် မခံရပ်နိုင်ဖြစ်လာပါက ပြည်သူဘက်သို့ အမြန်ဆုံးပူးပေါင်းရန်နှင့် လက်နက်နှင့်အတူ ပူးပေါင်းပါက ဆုကြေးငွေပါချီးမြှင့်သွားမည်ဟု YDF-Htilin က သတင်းစကားပါးသည်။