စစ်ကိုင်းတိုင်း၊ ခင်ဦးမြို့နယ်တွင် ငါးယောက်တစ်စုဖြင့် ခြေလျင်တက်လာသည့် အကြမ်းဖက်စစ်ကောင်စီတပ်အား မိုင်းဆွဲတိုက်ခိုက်ခဲ့ကြောင်း Khin U Support Organization-KSOအဖွဲ့က သတင်းထုတ်ပြန်သည်။
ယနေ့ (ဇွန်လ၂၇ရက်) နံနက်ပိုင်းက ရေဦးမြို့ဘက်မှ ခြေလျင်တက်လာသော စစ်ကောင်စီတပ်များအား မူးမြစ်ကူးတံတား အရှေ့ဘက်၊ ခင်ဦးနယ် အင်းပတ်ကွေ့အနောက်ဘက် ဖရုံယိုစက်အနီး၌ မိုင်းခွဲတိုက်ခိုက်ခဲ့ခြင်းဖြစ်ကြောင်း KSO၏ ထုတ်ပြန်ချက်တွင် ဖော်ပြသည်။
ရှေ့ထွက်မိုင်း၂လုံးတွဲဖြင့် ဖောက်ခွဲတိုက်ခိုက်ခဲ့ရာ အထိအခိုက်အသေအပျောက်ရှိပြီး ရေဦးမြို့ဘက်သို့ စစ်ကောင်စီတပ်သား ၂၀ခန့်ပြန်ဆုတ်သွားကြောင်း KSO က ပြောသည်။
အကြမ်းဖက်စစ်ကောင်စီတပ်များသည် ခန့်မှန်းအင်အား ၃၀ခန့်ဖြင့် ငါးယောက်တစ်စုစီ ခြေလျင်ခွဲလာခဲ့ခြင်းဖြစ်ပြီး ထိထိမိမိ ဖောက်ခွဲနိုင်ခဲ့ခြင်းဖြစ်ကြောင်း KSOက ဆိုသည်။
Public Service Announcement
“လောလောဆယ်တော့ ဘယ်ရွာမှ စစ်ကြောင်းထိုးတာ မရှိသေးပါဘူး။ ခင်ဦး-ရေဦး လမ်းပိုင်းတော့ အသွားအပြန်လုပ်နေကြတယ်။”ဟု KSOမှ တာဝန်ရှိသူက ပြောသည်။
ဇွန်လ ၂၃ရက်ကလည်း ခင်ဦးမြို့နယ် ဗအိုးကျေးရွာကို ဝင်ရောက်ဖျက်ဆီးပြီး ပြန်လာသည့် စစ်ကောင်စီတပ်မှ ယာဥ်နှစ်စီးကို ပဒေသာမိုင်းဆွဲတိုက်ခိုက်ရာ ငါးဦးသေ ဆုံးကြောင်း Royal Tiger Guerrilla Force က ထုတ်ပြန်ထားသည်။
ဇွန်လ ၂၂ရက်ကလည်း ခင်ဦးမြို့နယ်၊ ကံသစ်ရွာ အနောက်ဘက် မူးချောင်းတံတားအနီးစစ်ကောင်စီတပ်မှ ၁၄ဦးသေဆုံးခဲ့သည့် တိုက်ပွဲကြောင့် အထိနာနေသော စစ်တပ်က ခင်ဦးမြို့နယ်တွင် အင်အားများတိုးချဲ့၍ စစ်ကြောင်းထိုးပြီး ပြည်သူများကိုအကြမ်းဖက်နေခြင်းဖြစ်သည်။
