မုံရွာ-ယာကြီး-ကလေးဝလမ်းပိုင်းအား ရက်အကန့်အသန့်မရှိ ယာယီပိတ်လိုက်ကြောင်းချိုမိုင်မိုင် ယင်းမာပင်-ကနီမဟာမိတ်တပ်ပေါင်းစုနှင့် မဟယမိတ်(၅)ဖွဲ့က ပူးပေါင်းထုတ်ပြန်လိုက်သည်။
အဆိုပါလမ်းပိုင်းကို ယမန်နေ့(ဇွန် ၂၈)ရက်ကစပြီးပိတ်လိုက်ခြင်းဖြစ်ပြီး ယင်းလမ်းပိုင်းတွင် အကြမ်းဖက်စစ်ကောင်စီတပ်မှ လမ်း၏ဘယ် ညာတွင် နင်းမိုင်း၊ တိုက်မိုင်းများဖြင့် အများပြည်သူအန္တရာယ်ကျရောက်အောင်လုပ်ဆောင်နေခြင်းကြောင့်ဟု ဖော်ပြသည်။
“မိဘပြည်သူများ၏ အသက်အန္တရာယ်အားရှေးရူ၍ လမ်းပိုင်းအား အကန့်အသတ်မရှိယာယီပိတ်လိုက်ရခြင်းဖြစ်သည်။ အင်တာနက်လိုင်းအခက်အခဲကြောင့်ယခုလိုနောက်ကျမှတင်ပြရခြင်းအတွက် တောင်းပန်အပ်ပါသည်။ပူးပေါင်းပါဝင်ကြဖို့ လေးစားစွာဖြင့် မေတ္တာရပ်ခံအပ်ပါသည်”ဟု ချိုမိုင်မိုင် ယင်းမာပင်-ကနီ မဟာမိတ်တပ်ပေါင်းစုက အသိပေးသည်။
ပိတ်ရခြင်းအကြောင်းရင်းမှာ အကြမ်းဖက်စစ်ကောင်စီတပ်များ၏ ရက်စက်ယုတ်မာမှုများကြောင့် ပြည်သူများ အသက်အန္တရာယ် မထိခိုက်စေရန်အတွက်ဖြစ်ကြောင်း၊ ဘန့်ဘွေးရွာမတွင်ရှိသော အကြမ်းဖက်စစ်ကောင်စီတပ်များသည် မုံရွာ-ယာကြီး-ကလေးဝလမ်းပိုင်းအား လမ်း၏ညာဘက်တွင် နင်းမိုင်းများဖြင့်လည်းကောင်း၊လမ်းပေါ်တွင် တိုက်မိုင်းများဖြင့်လည်းကောင်း အသုံးပြု၍ ပြည်သူများ၏ အသက်အန္တရာယ်အား ထိခိုက်စေရန် ရည်ရွယ်ပြင်ဆင်ထားသည်ကို မျက်မြင်တွေ့ရှိရကြောင်း မဟာမိတ်အဖွဲ့များ၏ ထုတ်ပြန်ချက်တွင် ဖော်ပြသည်။
Public Service Announcement
ပြည်သူများအနေဖြင့် အရေးပေါ်ကျန်းမာရေးကိစ္စဖြင့် သွားလာမည်ဆိုပါက သက်ဆိုင်ရာ အဖွဲ့အစည်းအသီးသီးသို့ ဆက်သွယ်ချိတ်ဆက်ပြီးမှသာ အခြားလမ်းများက သွားလာကြရန်၊ ပြည်သူများ၏ လုံခြုံရေးအတွက် ယာယီလမ်းပိတ်သိမ်းရခြင်းဖြစ်ပြီး ပြည်သူများပူးပေါင်းဆောင်ရွက်ရန် မဟာမိတ်အဖွဲ့များကမေတ္တာရပ်ခံသည်။
ပူးပေါင်းဆောင်ရွက်ခြင်းမရှိဘဲ သွားလာနေပါက လုံခြုံရေး တာဝန်ယူမည်မဟုတ်ကြောင်း၊ အကြမ်းဖက်စစ်ကောင်စီက ပြည်သူနှင့် ပြည်သူ့ရဲဘော်များအား သွေးခွဲရန်ကြံစည်နေ၍ ပြည်သူများအနေဖြင့် အဆိုပါလမ်းပိုင်းအား စစ်ရေးသတိ၊ လုံခြုံရေးအသိဖြင့် အဆိုပါလမ်းပိုင်းအား အသုံးမပြုကြရန် မဟာမိတ်အဖွဲ့များကအသိပေးသည်။
မဟာမိတ်အဖွဲ့များတွင် “ချိုမိုင်မိုင်” ယင်းမာပင်၊ ကနီမဟာမိတ်တပ်ပေါင်းစု၊ Yinmabin Local Defence Force၊ Chindwin Galone Yarzar Guerrilla Defence Force၊ Alpha Special Force၊ Monywa True Of Force(MTOF)တို့ပါဝင်သည်။
မုံရွာခရိုင်၊ ချောင်းဦးမြို့နယ်ရှိ ချောင်းဦး-ပခုက္ကူလမ်းပိုင်းကိုလည်း ယနေ့နံနက်ခင်းမှစတင်ကာ သွားလာခွင့်ယာယီပိတ်ထားသည်။
