KNU ခလယ်လွီထူခရိုင် လယ်ဒို(ကျောက်ကြီး)မြို့နယ်မှာ စစ်ကောင်စီတပ်က ဒေသခံရွာသားကို သတ်ဖြတ်ခဲ့ပြီး ရုပ်အလောင်းအောက်မှာ မိုင်းထောင်ထားခဲ့တယ်လို့ KNU ဘက်က သတင်းထုတ်ပြန်ထားပါတယ်။
လယ်ဒိုမြို့နယ်အတွင်းမှာ စစ်ကောင်စီတပ်တွေဟာ နယ်မြေစိုးမိုးမှု၊ စစ်ရေးလှုပ်ရှားမှု တွေလုပ်လာလို့ ပြီးခဲ့တဲ့ ဇွန်လ ၂၅ ရက်က ငဗျက်အင်းရွာနဲ့ အင်းနက်ရွာကြားမှာ KNLA တပ်မဟာ ၃ နဲ့ တိုက်ပွဲဖြစ်ပွားခဲ့ပါသေးတယ်။
အဲဒီတိုက်ပွဲကြောင့် ဒေသခံရွာသွားတွေ ဘေးလွတ်ရာကိုထွက်ပြေးခဲ့ရပြီး ရွာထဲမှာ တော့ ကျွဲ ၊နွားတွေကို ကြိုးချည်ထားခဲ့ရပါတယ်။
နောက်ရက်မှာ အင်းနက်ရွာသား ၃ ဦးဟာ ကျွဲ ၊နွားတွေကို ကြိုးဖြည်ပြီး လွှတ်ပေးဖို့ ပြန်လာချိန်မှာ သေနတ်သံကြားလို့ ပြန်ပြေးလာရပါတယ်။ ဒီလို ပြန်ပြေးလာတဲ့ ရွာသား ၃ ဦး ထဲက ၂ ဦးပျောက်ဆုံးခဲ့တာပါ။
Public Service Announcement
၃ ရက်အကြာ ဇွန်လ ၂၉ ရက်မှာတော့ ပျောက်ဆုံးနေသူတွေကို ရွာသားတွေက ရှာဖွေကြရာမှာ စစ်ကောင်စီက သတ်ဖြတ်ထားခဲ့တဲ့ အင်းနက်ရွာသားစောမူးသာ(အသက်၄၀နှစ်)ရဲ့ ရုပ်အလောင်းကို အင်းနက် ဘုန်းကြီးကျောင်းရဲ့ အရှေ့ဖက် ငှက်ပျောရုံအနီးမှာတွေ့ခဲ့ရတယ်လို့သိရပါတယ်။
အလောင်းကိုမြေမြှုပ်ဖို့ ရွှေ့ချိန်မှာ အလောင်းအောက်မှာ မိုင်း ၃ လုံးထောင်ထားတာကိုတွေ့ခဲ့ရတယ်လို့ ဆိုကြပါတယ်။
ကျန်တဲ့ ရွာသား ၁ ဦးကိုတော့ ဆက်လက်ရှာဖွေနေဆဲလို့သိရပါတယ်။
