နိုင်ငံရေးအတိုက်အခံများနှင့်တွေ့ဆုံရန် စစ်ကောင်စီကို တရုတ်တိုက်တွန်း

အာဏာသိမ်း​စစ်ခေါင်း​ဆောင်နှင့်တရုတ်နိုင်ငံခြားရေးဝန်ကြီးမျက်နှာချင်းမဆိုင်​သေး

မြန်မာစစ်ကောင်စီအနေဖြင့် နိုင်ငံရေးအတိုက်အခံများနှင့် တွေ့ဆုံဆွေးနွေးရန်တရုတ်နိုင်ငံခြားရေးဝမ်ယိကတိုက်တွန်းကြောင်း AFP သတင်းဌာနက ယနေ့ဖော်ပြသည်။

စစ်အာဏာသိမ်းပြီးနောက်ပိုင်း မြန်မာနိုင်ငံကို ပထမဆုံးအကြိမ်လာရောက်သည့် ပုဂံခရီးစဉ်အတွင်း ဝမ်ယိက စစ်ကောင်စီအနေဖြင့် နိုင်ငံရေးဆိုင်ရာအမျိုးသားပြန်လည်သင့်မြတ်ရေး ရှာဖွေရန် တရုတ်က မျှော်လင့်ထားကြောင်း ထုတ်ဖော်ပြောကြားခြင်းဖြစ်သည်။

၇ ကြိမ်မြောက် လန်ချန်း-မဲခေါင်ပူးပေါင်းဆောင်ရွက်ရေး နိုင်ငံခြားရေးဝန်ကြီးများအစည်းအဝေး တက်ရောက်ရန် တရုတ်နိုင်ငံခြားရေးဝန်ကြီး ဝမ်ယိသည် ပုဂံသို့လာရောက်ခဲ့ခြင်းဖြစ်ပြီး ၃ ရက်ကြာ ခရီးစဉ်အတွင်း အာဏာသိမ်းစစ်ခေါင်းဆောင် မင်းအောင်လှိုင်နှင့်တွေ့ဆုံခြင်းမရှိသေးပေ။

လုံခြုံရေးအာမခံချက်ရှိပြီး စစ်ကောင်စီ၏ အစိုးရရုံးများစိုက်ရာ နေပြည်တော်၌ အထက်ပါအစည်းအဝေးကျင်းပခြင်းမရှိသည်မှာ ထူးခြားချက်ဖြစ်သည်။

Public Service Announcement

တရုတ်နိုင်ငံခြားရေးဝန်ကြီးဝမ်ယိသည် အာဏာမသိမ်းမီ ၃ ပတ်အလိုတွင် နေပြည်တော်သို့ လာရောက်ကာ အရပ်သားအစိုးရခေါင်းဆောင် နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်း စုကြည်၊ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်တို့နှင့် သီးခြားစီ တွေ့ဆုံခဲ့သည်။

ထို့အပြင် ဝမ်ယိသည် NLD အစိုးရလက်ထက် လာရောက်သောခရီးစဉ်များအားလုံးမှာ နေပြည်တော်သို့ပင်ဖြစ်သည်။

အာဏာသိမ်းပြီးနောက်ပိုင်း တစ်နှစ်ကျော်တွင် လာရောက်သောခရီးစဉ်သည် လန်ချန်း-မဲခေါင် ပူးပေါင်းဆောင်ရွက်ရေး နိုင်ငံခြားရေးဝန်ကြီးများအစည်းအဝေးဖြစ်ပြီး အဖွဲ့ဝင်နိုင်ငံများဖြစ် သည့် ကမ္ဘောဒီးယား၊ လာအို၊ဗီယက်နမ်၊ ထိုင်းနိုင်ငံခြားရေးဝန်ကြီးများလည်း ပုဂံသို့ရောက်ရှိနေသည်။

ထိုအစည်းအဝေးကာလအတွင်းအာဏာသိမ်းစစ်ခေါင်းဆောင်မင်းအောင်လှိုင်သည် ရန်ကုန်မြို့သို့ရောက်ရှိနေသည်။

စစ်​ကောင်စီသတင်းထုတ်ပြန်​ရေး​အဖွဲ့​ခေါင်း​ဆောင်ဗိုလ်ချုပ်​ဇော်မင်းထွန်းက တရုတ်နိုင်ံခြား​ရေးဝန်ကြီးအပါအဝင်အစည်းအ​ဝေးတက်​ရောက်​သောနိူင်ငံခြား​ရေးဝန်ကြီးများမြန်မာနိုင်ငံလာ​ရောက်ခြင်းသည် အာဏာသိမ်းစစ်​ကောင်စီကို အသိအမှတ်ပြုခြင်းဖြစ်​ကြောင်း ​လွန်ခဲ့​သောသောကြာ်​နေ့ကပြုလုပ်​သောသတင်းစာရှင်းလင်းပွဲတွင်​ပြောသည်။

လန်ချန်း-မဲခေါင် ပူးပေါင်းဆောင်ရွက်ရေး နိုင်ငံခြားရေး၀န်ကြီးအစည်းအဝေး ကျင်းပရန် ကြိုးပမ်းမှုသည် မြန်မာပြည်သူများ၏ ဆန္ဒကို ချိုးဖောက်ကျူးလွန်ခြင်းဖြစ်ကြောင်း အမျိုးသားညီညွတ် ရေးအစိုးရ(NUG)နိုင်ငံခြားရေးဝန်ကြီးဌာနကထုတ်ပြန်ထားသည်။

ထို့အပြင် ဝမ်ယိ၏ မြန်မာနိုင်ငံခရီးစဉ်သည် လန်ချန်း-မဲခေါင်ပူးပေါင်းဆောင်ရွက်ရေး၏ အခြေခံကြေညာချက်(Sanya Declaration)ပါ အချက်များနှင့် ဆန့်ကျင်နေသည်ဟု NUG နိုင်ငံခြားရေးဝန်ကြီး ဒေါ်ဇင်မာအောင်က ပြောကြားထားသည်။