စစ်ကိုင်းတိုင်း၊ အရာတော်မြို့နယ် ဆင်တလည်ကျေးရွာကို အကြမ်းဖက်စစ်ကောင်စီတပ်နှင့် ပျူစောထီးများ၏ မီးရှို့ဖျက်ဆီးမှုကြောင့် နေအိမ် ၇၀နီးပါး မီးလောင်ဆုံးရှုံးခဲ့ကြောင်း ဒေသတွင်းသတင်းရင်းမြစ်များက ပြောသည်။
ယမန်နေ့ (ဇူလိုင် ၁၃ ရက်) နံနက် ၁၀နာရီခန့်က အရာတော်မြို့နယ်ရှိ ဆင်တလည်ရွာအား စစ်ကောင်စီတပ်နှင့် ပျူစောထီးများက လက်နက်ကြီးများဖြင့် ပစ်ခတ်ကာ ဝင်ရောက်လာခဲ့ခြင်းဖြစ်ပြီး ရွာသူ၊ရွာသားများ ထွက် ပြေးတိမ်းရှောင်ခဲ့ရသည်။
ဝင်ရောက်လာသည့် စစ်ကောင်စီတပ်နှင့်အတူ ငွေတွင်းရွာနှင့် သလဲဘာကျေးရွာတဝိုက်မှ ဒေသခံပျူစောထီးများလည်း ပါဝင်ခဲ့ကြောင်း ဒေသခံများက ပြောသည်။
ကျေးရွာကိုဝင်ရောက်စီးနင်းပြီး မီးပတ်ရှို့ခဲ့ရာ ဆင်တလည်ရွာအဝင်လမ်းဝဲယာမှစ၍ နေအိမ် ၅၀ခန့် ပြာကျခဲ့ကာ စုစုပေါင်းနေအိမ် ၇၀ နီးပါးလောင်ကျွမ်းပျက်စီးခဲ့ကြောင်း ဒေသတွင်း အရာတော်ပို့စ်က အသိပေးသည်။
Public Service Announcement
စစ်ကောင်စီတပ်သည် ပြီးခဲ့သည့် ဇူလိုင် ၈ ရက်က အရာတော်မြို့နယ်၊ နွားမသင်းကျေးရွာကို ဝင်ရောက်စီးနင်းပြီး ရွာအနီးတောခြေရှိ ပြည်သူ့ကာကွယ်ရေးစခန်းတစ်ခုကို ဖျက်ဆီးသွားခဲ့ကာ ကာကွယ်ရေးရဲဘော်တစ်ဦးကို သတ်ဖြတ်သွားခဲ့သည်။
ထိုနေ့ကပင် စစ်ကောင်စီတပ် ပြန်ထွက်သွားပြီးနောက် ရွာခံစစ်တပ်သတင်းပေးဟု နာမည်ကြီးသူတစ်ဦး ရှင်းလင်းခံခဲ့ရသည်။
