လူသေဆုံးမှုဖြစ်ခဲ့သည့် မြေနီကုန်းတံတားအနီး ပေါက်ကွဲမှုဖြစ်စဥ်မှာ ၎င်းတို့ပြုလုပ်ခြင်း မဟုတ်ကြောင်း စမ်းချာင်းမြို့နယ်ပြည်သူ့ကာကွယ်ရေး တပ်ဖွဲ့(People’s Defence Force Sanchaung Township)က ဇူလိုင် ၁၄ ရက်တွင် အသိပေးထုတ်ပြန်သည်။
ဇူလိုင် ၁၂ ရက် ဝါဆိုလပြည့်နေ့တွင် စမ်းချောင်းမြို့နယ် ပြည်လမ်းနှင့် ဗားကရာ လမ်းထောင့် မြေနီကုန်းတံတား အနီးပေါက်ကွဲမှုဖြစ်ခဲ့ပြီး ပြည်သူအချို့ ထိခိုက်သေဆုံးသည်ဟု ကြားသိ ရသောကြောင့် စိတ်မကောင်းကြောင်း ထုတ်ပြန်ချက်၌ ဖော်ပြထားသည်။
“People’s Defence Force Sanchaung အနေဖြင့် ၇.၆.၂၀၂၂ ရက်နေ့တွင် ကြေညာချက်အမှတ် ၀၀၄/စခ/၂၀၂၂ ဖြင့် စာသင်ကျောင်းများ၊ဆရာ/ဆရာမ များ၊ကျောင်းသူ/သားများ၊ဘာသာရေး အဆောက်အဦးများလူစည်ကားရာ အများနှင့်သက်ဆိုင်သောနေရာများနှင့်အပြစ်မဲ့ပြည်သူများအား လုံးဝ(လုံးဝ)တိုက်ခိုက်ခြင်းပြုလုပ်မည်မဟုတ်ပါဟု ကြေညာချက်ထုတ်ပြန်ထား ပြီးဖြစ်ပါသည်။” ဟု ယင်းအဖွဲ့၏ ထုတ်ပြန်ချက်တွင် ဖော်ပြထားသည်။
၎င်းတို့အဖွဲ့အနေဖြင့် အကြမ်းဖက်စစ်ကောင်စီနှင့် ၎င်းတို့၏ထောက်တိုင်များ မှအပ အခြားသော မည်သည့်တိုက်ခိုက်မှုမျိုးကိုမှ လုပ်ဆောင်မည်မဟုတ် ကြောင်း ထပ်မံအသိပေးကြေညာကြောင်း ထုတ်ပြန်ထားသည်။
Public Service Announcement
အဆိုပါပေါက်ကွဲမှုကြောင့် အမျိုးသမီးနှစ်ဦးသေဆုံးပြီး ကိုးဦးဒဏ်ရာရရှိခဲ့ ကြောင်း မီဒီယာများက ဖော်ပြထားသည်။
ယခုရက်ပိုင်းအတွင်း ရန်ကုန်မြို့၌ စစ်ဆင်ရေးများပြုလုပ်မည်ဟု ကြေညာထားသည့် Burma Dragon Army ကလည်း ယင်းဖောက်ခွဲမှုကို ၎င်းတို့အဖွဲ့နှင့် မဟာမိတ်အဖွဲ့များက လုပ်ဆောင် ခြင်းမဟုတ်ကြောင်း ကြေညာချက်ထုတ်ပြန်ထားသည်။
ဝါဆိုလပြည့်နေ့တွင် ရွှေတိဂုံဘုရားသို့လာရောက်သူများပြားသောကြောင့် မြေနီကုန်းအနီးတဝိုက်၌ လူသွားလူလာများပြားခဲ့ပြီး ပြည်သူများကို ထိခိုက်မည့် ဖောက်ခွဲမှုမျိုးကိုပြည်သူ့ကာကွယ်ရေး တပ်ဖွဲ့များအနေဖြင့်လုပ်ဆောင်မည် မဟုတ်ဟု ပြည်သူများက ယုံကြည်ထားသည်ဟု ဆိုသည်။
ထို့ပြင် ယင်းပေါက်ကွဲမှုတွင် အကြမ်းဖက်စစ်ကောင်စီများကို ထိခိုက်ခဲ့ခြင်း မရှိသလို လာရောက် စစ်ဆေးသည့်ကားများသည်လည်းအေးအေးဆေးဆေးသာ မောင်းနှင်လာခြင်းဖြစ်သည်ဟု မျက်မြင်တွေ့ရှိသူတစ်ဦးက ရေးသားထားသည်။
ထို့ပြင် ပေါက်ကွဲမှုဖြစ်ချိန်တွင်လည်း မြေနီကုန်းတံတားအောက်ရှိ စစ်ကောင်စီတပ်ဖွဲ့ဝင်များသည် ဟန်မပျက်ရှိနေသည်ဟု မျက်မြင်တွေ့ရှိသူ တစ်ဦးက လူထုနွေဦးကို ပြောကြားထားသည်။
ပြည်သူ့ကာကွယ်ရေးတပ်ဖွဲ့များအနေဖြင့် မြေနီကုန်းတံတားအောက်ရှိ စစ်ကောင်စီတပ်များကို ဖောက်ခွဲရန် စီစဉ်ခဲ့ဖူးသော်လည်း ပြည်သူများသွားလာနေသောကြောင့် စစ်ဆင်ရေးဖျက် သိမ်းရသည့် ဖြစ်စဉ်များရှိခဲ့သည်။
