ရန်ကုန်မြို့ လှိုင်မြို့နယ်တွင် စစ်ကောင်စီတပ်မှ ဗိုလ်ကြီးအဆင့်ရှိသူ အောင်နိုင်ဖြိုးနှင့် ၎င်း၏ ဇနီးပစ်သတ်ခံရကြောင်း ဒေသခံများက ပြောသည်။
ယနေ့(ဇူလိုင် ၁၈ ရက်) နံနက် ၉ နာရီခွဲခန့်က လှိုင်မြို့နယ်ပိတောက်ချောင်း၊ (၂) ရပ်ကွက်၊ ဘုရင့်နောင် (၉) လမ်းတွင် ပစ်သတ်ခံရခြင်းဟု ဆိုသည်။
“သူတို့နေတာက ဘုရင့်နောင် (၄)လမ်းထဲမှာလို့ပြောတယ်။ ကားနဲ့ထွက်လာတဲ့အချိန် ဘုရင့်နောင် (၉)လမ်းထဲမှာ ပစ်သတ်ခံရတာ”ဟု လှိုင်မြို့နယ်တွင် နေထိုင်သူတစ်ဦးက ရှင်းပြသည်။
အကြမ်းဖက်စစ်ကောင်စီ၏ ဝါဒဖြန့်သတင်းပေ့ချ် များ၏ အဆိုအရ သေနတ်ဖြင့် ငါးချက်အနီးကပ်ပစ်ခတ်သဖြင့် ဗိုလ်ကြီးအောင်နိုင်ဖြိုးနှင့်မဂျူးဂျူးအောင်တို့တွင် လည်ပင်းနှင့်နား ထင်ကျည်ထိမှန်ဒဏ်ရာများဖြင့်အခင်းဖြစ်နေရာတွင် သေဆုံးသွားကြောင်း ဖော်ပြသည်။
Public Service Announcement
မကြာသေးမီလပိုင်းက မြို့ပြစစ်ဆင်ရေးများ အရှိန်မြှင့်တော့မည်ဟု တော်လှန်ရေးအင်အားစုများ၏ ကြေညာပြီးနောက် ရန်ကုန်မြို့တွင် အကြမ်းဖက်စစ်တပ်မှအရာရှိအဆင့်တစ်ဦး သေဆုံးခဲ့သည်။
ထို့အပြင် ယခုရက်ပိုင်းအတွင်း မရမ်းကုန်း၊ရွှေပြည်သာ၊ မြောက်ဒဂုံမြို့နယ်တို့တွင် စစ်ကောင်စီခန့် အုပ်ချုပ်ရေးမှူးများနှင့် ရဲတပ်သားအချို့ကို မြို့ပြပြောက်ကျားအဖွဲ့များက ရှင်းလင်းထားသည်။
