မကွေးတိုင်း ဆိပ်ဖြူမြို့နယ် ဆော – ဆိပ်ဖြူလမ်းပိုင်းပေါ်ရှိ အိုင်ကြီးရွာ နှင့် ဖလံမကျေးရွာကြားသို့စစ်ကြောင်းထိုးလာသည့် စစ်ကောင်စီတပ်ကို မိုင်းဆွဲတိုက်ခိုက်ခဲ့ကြောင်း PDF ချောက်က ယနေ့ (ဇူလိုင် ၂၁ရက်) ထုတ်ပြန်သည်။
ဆိပ်ဖြူဘာမထီပြည်သူ့ကာကွယ်ရေးတပ်ဖွဲ့နှင့် မဟာမိတ်ညီနောင်များဖြစ်သော ချောက်(ပကဖ)တပ်ဖွဲ့ဝင်များပူးပေါင်း၍ အိုင်ကြီးရွာနှင့် ဖလံမရွာကြားသို့ စစ်ကောင်စီတပ်ကို ယမန်နေ့(ဇူလိုင် ၂၀ရက်)တွင် မိုင်းဆွဲခဲ့ခြင်းဟု ဆိုသည်။
ထိုတိုက်ခိုက်မှုတွင် စစ်ကောင်စီတပ်သားများမိုင်းထိမှန်၍ ဒဏ်ရာရရှိသည်ကိုသာ သိရှိရသေးပြီးသေဆုံးသူရှိ၊မရှိကို အတည်မပြုနိုင်သေးပေ။
စစ်ကောင်စီတပ်က မိုင်းဆွဲတိုက်ခိုက်ခံရပြီးနောက် အင်အား ၁၂၀ခန့်ပါ စစ်ကြောင်းတစ်ခုထပ်မံ၍ အင်အားတိုးလာသည်ဟုလည်း အသိပေးသည်။
Public Service Announcement
ဒေသတွင်းတိုက်ပွဲများ အချိန်မရွေးဖြစ်လာနိုင်သဖြင့် ယခုရက်ပိုင်းအတွင်း ဆော – ဆိပ်ဖြူလမ်းပိုင်းကိုလည်း အသုံးမပြုရန်ဒေသကာကွယ်ရေးတပ်များက သတိပေးထားသည်။
ယခုလ ပထမပတ်ကစ၍ ဆိပ်ဖြူမြို့နယ်အတွင်း ကျေးရွာများကို စစ်ကောင်စီတပ်က စစ်ကြောင်းထိုးလာပြီးနောက် ဒေသခံပြည်သူ ၄၀၀ကျော်မှာ စစ်ဘေးရှောင်နေရသည်။
စစ်ကောင်စီတပ်က ဆိပ်ဖြူမြို့နယ် အခြေစိုက်(ကပစ ၂၁)၊ လေကြောင်းရန်ကာကွယ်ရေးတပ်ရင်း နှင့် ရွှေဘိုးကျွန်းရွာအခြေစိုက် (ကပစ ၂၂)တပ်များမှ စစ်ကြောင်းထိုးနေခြင်းဖြစ်ကြောင်း ဒေသတွင်းသတင်းရင်းမြစ်များက ဖော်ပြသည်။
