တမူးမြို့ အိန္ဒိယနိုင်ငံနှင့် နယ်စပ်အနီးရှိ နေအိမ်တစ်အိမ်မှ အိမ်ရှင်ကို လက်နက်ကိုင်လူတစ်စုက သေနတ်ဖြင့်ပစ်ခတ်ပြီး ငွေကြေးများလုယူသွားခဲ့သည်။
အိန္ဒိယနိုင်ငံနယ်စပ်နှင့် ကပ်လျက်ရှိသော နမ့်ဖာလုံမီးသတ်ရုံးအနီးမှ ဦးယောကြီး၏နေအိမ်ကို ယမန်နေ့ (ဇူလိုင် ၂၀ရက်) ညနေ ၅ နာရီ ၁၅မိနစ်တွင် လက်နက် ကိုင်ဆောင်ထားသူအချို့က ဝင်ရောက်ပြီး ဦးယောကြီးကို သေနတ်ဖြင့် ပစ်ခတ်သွားသည်ဟု ဒေသခံများကပြောသည်။
“လုပ်သေနတ်နဲ့ ပစ်သွားတာ။ သေနတ်ကျည်က ပါးစပ်ကနေဝင်ပြီး လည်ပင်းကနေ ထွက်သွားတယ်။ ငွေတွေလည်း ယူသွားတယ်”ဟု တမူးဒေသခံတစ်ဦးကပြောသည်။
ဦးယောကြီး၏ ဖြစ်စဥ်နှင့်ပတ်သက်ပြီး ယခုလုပ်ရပ်သည် ရည်ရွယ်ချက်ရှိရှိ အကြမ်းဖက်ခြင်းဟု ဒေသခံများက ယူဆနေသည်။
Public Service Announcement
“ပျူစောထီးတွေ လုပ်တာလို့ သုံးသပ်လို့ရတယ်။ မနေ့ကလည်း ပျူစောထီးတွေက မြို့ရဲ့ဘောလုံးကွင်းထဲ ဝင်ပြီး ဗုံးခွဲသွားတယ်။ပေါက်ကွဲသံတော်တော်ကျယ်တယ်။ ဘာကြောင့်လုပ်သွားမှန်းတော့ မသိဘူး” ဟု ဒေသခံတစ်ဦးက ပြောသည်။
သေနတ်ဖြင့် ပစ်ခတ်ခံရသူ ဦးယောကြီးမှာ လက်ရှိတွင် ပြင်းထန်ဒဏ်ရာရရှိပြီး ဆေးရုံ၌ ကုသမှုခံယူနေကြောင်း ၎င်းကဆက်ပြောသည်။
ပြည်သူ့ကာကွယ်ရေးတပ်ဖွဲ့များသည် မြို့ပြင်ဘက်၌သာ နယ်မြေစိုးမိုးမှုအထိုက်အလျောက်ရနေသောကြောင့် မြို့ပေါ်တွင် ပျူစောထီးများက လူထုအား အနိုင့်ကျင့်သည့်လုပ်ရပ်များပေါ်ပေါ်တင်တင်ပြုလုပ်နေသည်ဟု ဒေသခံများကပြောသည်။
