စစ်ကိုင်းတိုင်း၊ တန့်ဆည်မြို့နယ် အင်္ကုက္ကားကျေးရွာရှိ အကြမ်းဖက်စစ်ကောင်စီ တပ်အား ယမန်နေ့ညက နှစ်ကြိမ်တိုင်သွားရောက်တိုက်ခိုက်ရာ ပျူစောထီး နှစ်ဦးသေဆုံးကြောင်း Guerrilla Warfare – KPK PDFအဖွဲ့က ထုတ်ပြန်သည်။
ည၉နာရီ ၁၅မိနစ်တွင်တစ်ကြိမ်၊ ည ၁၁ နာရီခန့်တွင်တစ်ကြိမ် စုစုပေါင်း တိုက်ပွဲနှစ်ကြိမ်ဖြစ်ပွားခဲ့ပြီး ပျူစောထီးနှစ်ဦးသေဆုံးကာ အကြမ်းဖက် စစ်သားတစ်ဦး ဒဏ်ရာရရှိခဲ့ကြောင်း Guerrilla Warfare – KPK PDF အဖွဲ့၏ ထုတ်ပြန်ချက်တွင် ဖော်ပြသည်။
အထက်ပါစစ်ဆင်ရေးအား ရွှေဘိုခရိုင်တပ်ရင်း (၈) တပ်ခွဲ -၁ဖြစ်သော Guerrilla Warfare – KPK PDF နှင့် မဟာမိတ်တပ်ပေါင်းစုတို့မှ ပူးပေါင်းတိုက်ခိုက်ခဲ့ခြင်းဖြစ်ပြီး ပြည်သူ့ရဲဘော်များ အထိခိုက်မရှိဟု Guerrilla Warfare – KPK PDF က အသိပေးသည်။
ပြီးခဲ့သည့် ဇူလိုင် ၂၆ ရက် ည ၁၁နာရီခွဲခန့်ကလည်း အင်္ကုက္ကားရွာရှိ စစ်ကောင်စီ တပ်အား တိုက်ခိုက်ခဲ့ရာ လက်နက်ကြီးများဖြင့် နှစ်ဖက်အပြန်အလှန် ပစ်ခတ်တိုက်ခိုက်ခဲ့ကြောင်း Guerrilla Warfare – KPK PDFအဖွဲ့က အသိပေးထားသည်။
Public Service Announcement
အကြမ်းဖက်စစ်တပ်၏ ထိခိုက်မှုအခြေအနေများနှင့်ပတ်သက်၍ People’s Spring က ထပ်မံအတည်ပြုနိုင်ခြင်း မရှိသေးပါ။ ဖြစ်စဥ်များနှင့်ပတ်သက်၍ Guerrilla Warfare – KPK PDFအဖွဲ့ကထံ ဆက်သွယ်မေးမြန်းထားပြီး ပြန်လည်ဖြေကြားခြင်းမရှိသေးပါ။
ဇူလိုင် ၂၇ရက်ကလည်း တန့်ဆည်မြို့နယ်တွင် စစ်ကောင်စီတပ်အား ရေဦးကုန်းရွာ၊ ချောင်းဆုံ ကျေးရွာ နှင့် ကံထူးမရဲစခန်းတို့တွင် သုံးကြိမ်တိုင် တိုက်ခိုက်ခဲ့ပြီး ထိခိုက်သေဆုံး မှုများရှိကြောင်း ဒေသတွင်းPDFအဖွဲ့များက ပြောထားသည်။
