စစ်ကိုင်းတိုင်း ခင်ဦးမြို့နယ်တွင် ကာကွယ်ရေးတပ်ဖွဲ့ခေါင်းဆောင်တစ်ဦးနှင့်ရဲဘော်နှစ်ဦး ကျဆုံးခဲ့ရပြီး ၎င်းတို့အတွက် ဝမ်းနည်းကြောင်း ခင်ဦးနယ်ဒေသခံကာကွယ်ရေးမဟာမိတ်အင်အားစု(KURDAF)အဖွဲ့က ယမန်နေ့ (ဇူလိုင် ၃၁)က ထုတ်ပြန်သည်။
ဇူလိုင် ၁၈ရက်က ခင်ဦးနယ် ဒေသခံကာကွယ်ရေး မဟာမိတ်အင်အားစု (KURDAF)၏ မဟာမိတ်အဖွဲ့ဝင် ဒေသခံကာကွယ်ရေး ရဲဘော်နှစ်ဦး ကျဆုံးခဲ့သည်။
၎င်းရဲဘော်နှစ်ဦးသည် ခင်ဦးမြို့နယ်၊ ယာတော်-ဥယျာဉ်-သာဝတ္ထိ-မုံလှ-ကျီစုလမ်းပိုင်းတွင် အကြမ်းဖက်စစ်ကောင်စီ၏ စစ်ကြောင်းနှင့် တည့်တည့်တိုးပြီး ပစ်သတ်ခံခဲ့ရခြင်းဖြစ်သည်။
အလားတူ ဇူလိုင် ၂၆ ရက်ကလည်း ခင်ဦးနယ် ဒေသခံကာကွယ်ရေး မဟာမိတ်အင်အားစု (KURDAF)၏ မဟာမိတ်အဖွဲ့ဝင်ကာကွယ်ရေး ခေါင်းဆောင်တစ်ဦး ကျဆုံးခဲ့သည်။
Public Service Announcement
ထိုနေ့က ခင်ဦးမြို့နယ်ရှိ ကျေးရွာတစ်ရွာတွင် အကြမ်းဖက်စစ်ကောင်စီစစ်ကြောင်းထိုး ပစ်ခတ်မှုကြောင့် အသက် (၁၃)နှစ်အရွယ် ကလေးငယ်တစ်ဦး ကျည်သင့်ခဲ့သည်။
ကျဆုံးကာကွယ်ရေးခေါင်းဆောင်သည် ထိုကလေးငယ်ကို ဆေးကုသရန် ကားဖြင့်ကယ်ထုတ် လာစဥ် ရွာအနီးအနားတွင် အကြမ်းဖက်စစ်ကောင်စီတပ်စစ်ကြောင်း၏ ပစ်ခတ်မှုကြောင့်ကျည်ထိမှန် ကျဆုံးခဲ့သွားခဲ့ခြင်း ဖြစ်သည်။
ကျဆုံးသွားသော ဒေသခံကာကွယ်ရေး ခေါင်းဆောင်နှင့် ရဲဘော်နှစ်ဦး၏ ခေါင်းဆောင်ပီသမှု ၊ စွန့်လွတ်မှု ၊ ရဲရင့်မှုတို့အတွက် ခင်ဦးနယ် ဒေသခံ ကာကွယ်ရေး မဟာမိတ်အင်အားစု (KURDAF) အဖွဲ့(၈)ဖွဲ့က အလေးနီပြုပြီး ဝမ်းနည်းကြောင်း ထုတ်ပြန်သည်။
ထို့အပြင် မိသားစုနှင့်ထပ်တူ ဝမ်းနည်းကြေကွဲရပါကြောင်းနှင့် မပြီးဆုံးသေးသော စစ်အာဏာရှင် စနစ်ကျရှုံးရေးနှင့် ဖက်ဒရယ်ဒီမိုကရေစီ ပြည်ထောင်စုတည်ဆောက်ရေးအတွက် ဆက်လက်တိုက်ပွဲဝင်သွားမည်ဟု ခင်ဦးနယ် ဒေသခံကာကွယ်ရေး မဟာမိတ်အင်အားစု (KURDAF)က ကတိပြုခဲ့သည်။
