ရေဘေးကြုံနေတဲ့ ခင်ဦးမြို့နယ်က ပြည်သူတွေကို စစ်တပ် ဗုံးကြဲ

ဩဂုတ်-၇၊၂၀၂၆။နှင်း/People’s Spring

စစ်ကိုင်းတိုင်း၊ ခင်ဦးမြို့နယ်မှာ ဒေသခံတွေ ရေဘေးကြုံတွေ့နေစဉ်မှာ စစ်တပ်က လေကြောင်းကနေ ဗုံးကြဲတိုက်ခိုက်ခဲ့တယ်လို့ ဒေသခံတွေက ပြောပါတယ်။

ဒီကနေ့ သြဂုတ် ၇ ရက် မနက် ၁ နာရီခန့်ကစပြီး ခင်ဦးမြို့နယ်က မူးမြစ်(နတ်မူး)အရှေ့ဘက်နဲ့ DY-1 တူးမြောင်းအတွင်းရှိ ဥယျာဥ်၊ကျွန်းတောကြီး၊ယာတော်၊မကျီးအုပ်၊သရက်ပင်စု၊ကားဆိပ်၊မြင်းဒေါင်း၊အင်းပတ်၊ရွာသစ်၊မူးသာ၊သက်ပေး၊ဇီးတော၊လက်ပံကွက်၊တာတိုင်စတဲ့ ကျေးရွာတွေကို မူးမြစ်ရေတွေ စတင်ဝင်ရောက်နေလို့ ဒေသခံ ထောင်နဲ့ချီ ဘေးလွတ်ရာ ရေဘေးရှောင်နေရကြောင်း ခင်ဦးမြို့နယ် သတင်းမှန်ပြန်ကြားရေးအဖွဲ့က ပြောပါတယ်။

အခုလို ဒေသခံပြည်သူတွေ ‌ရေဘေးဒုက္ခရောက်နေချိန်မှာ စစ်တပ်က ရွှေဘိုမြို့ အမှတ်(၈)လေ့‌ကျင့်ရေး သင်တန်းကျောင်းကနေ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌ခင်ဦးမြို့နယ်အရှေ့ခြမ်းကို အသေခံဒရုန်းတွေနဲ့ ဗုံးကြဲ တိုက်ခိုက်နေတယ်လို့ ဒေသခံတွေက ပြောပါတယ်။

Public Service Announcement

“ဒီမနက်က လေးစီးရှိပြီ။ခင်ဦးမြို့နယ်တနေရာလို့ပဲ သိရသေးတယ်။ဆက်တိုက် ဒရုန်းတွေနဲ့ဗုံးကြဲနေတယ်”လို့ဒေသခံတစ်ဦးက ပြောပါတယ်။

ဇူလိုင်အတွင်းမှာလည်း စစ်တပ်က ခင်ဦးမြို့နယ်၊ငါးတင်းကြီးရွာ စာသင်ကျောင်းကို လေကြောင်းတိုက်ခိုက်ခဲ့တာမို့ ပြည်သူ ၆ဦး ဒဏ်ရာရခဲ့ပါတယ်။

မူးမြစ်ရေဟာ ခင်ဦးမြို့နယ်အပြင် ဒီပဲယင်း၊ ရေဦး၊ တန့်ဆည်နဲ့ စစ်ကိုင်း၊ ဝက်လက်၊ မြင်းမူနယ်ဘက်တွေအထိ သက်ရောက်မှာဖြစ်ပြီး အဆိုပါ ဒေသတွေမှာ ရေကြီးရေလျှံမှုတွေ ကြုံတွေ့နေရပြီဖြစ်ကြောင်း ဒေသခံတွေက ပြောပါတယ်​။