ပြည်သူ့ကာကွယ်ရေးမဟာမိတ်များနှင့် စစ်ကောင်စီတပ် ယနေ့ ညနေတွင် တိုက်ပွဲအပြင်းအထန်ဖြစ်နေ၍ ဒေသခံများနှင့် ခရီးသွားပြည်သူများအနေဖြင့် ကလေးမြို့နယ်တောင်ပိုင်းသို့ ဖြတ်သန်းသွားလာခြင်းမပြုကြရန် ပြည်သူ့ကာကွယ်ရေးရဲဘော်များက သတိပေးသည်။
ကလေးနည်းပညာတက္ကသိုလ်၏ တောင်ဘက်ရှိ သာယာကုန်းရွာအနီးတွင် အကြမ်းဖက်စစ်ကောင်စီတပ်ဖွဲ့များနှင့် PDF (Kalay) ၊ ပ.က.ဖ (ကလေး) ၊ CNDF ၊ CDF – KKG နှင့် RKDF ပူးပေါင်းတပ်ဖွဲ့များ ယနေ့(သြဂုတ် ၄ရက်)ညနေတွင် တိုက်ပွဲပြင်းထန်နေခြင်း ဖြစ်သည်။
“စစ်ရေးအခြေအနေများအရ ကလေးတောင်ပိုင်းကို မော်တော်ယာဉ်တွေ ဖြတ်သန်းသွားလာခြင်း လုံးဝမပြုဖို့ မေတ္တာရပ်ခံအပ်ပါတယ်”ဟု ကလေးမြို့နယ်ပြည်သူ့ကာကွယ်ရေးတပ်ဖွဲ့မှ တပ်ဖွဲ့ဝင် တစ်ဦးက ပြောသည်။
တိုက်ပွဲသည် အလွန်ပြင်းထန်နေပြီး သေနတ်သံများနှင့် လက်နက်ကြီးပစ်ခတ်သံများကို မြို့ပေါ်မှ အတိုင်းသားကြားနေရသည်ဟု ဒေသခံများကပြောသည်။
ယနေ့တိုက်ပွဲတွင် စစ်ကောင်စီတပ်သားအများအပြားသေဆုံးပြီး မကြာမီသတင်းထုတ်ပြန်မည်ဟု တိုက်ပွဲတွင် ပါဝင်တိုက်ခိုက်နေသည့် CDF – KKG (Chinland Defense Force Kalay-Kabaw-Gangaw)က ထုတ်ပြန်ထားသည်။
“ကလေးမြို့တောင်ပိုင်း တိုက်ပွဲပြင်းထန်နေပါသည်။ စကစ ဘက် အကျအရှုံးများပါတယ်။ မိဘပြည်သူများ ကလေးတောင်ပိုင်း သို့ အသွားအလာ မလုပ်ပါရန်မေတ္တာ ရပ်ခံပါတယ်” ဟု CDF – KKGက ထုတ်ပြန်ထားသည်။