ဒီပဲယင်းတွင် စစ်ကောင်စီတပ်က ခြောက်ရက်အတွင်း ဒေသခံပြည်သူရှစ်ဦးကို သတ်ဖြတ်

နေအိမ် ၁၅၀ကျော် မီးရှို့ဖျက်ဆီး၊ ဒေသခံပြည်သူ ၄၀ ကျော်ကို လူသားဒိုင်း အဖြစ် ဖမ်းဆီးခံထားရ

စစ်ကိုင်းတိုင်း၊ ဒီပဲယင်းမြို့နယ်တွင် အကြမ်းဖက်စစ်ကောင်စီတပ်က စစ်ကြောင်းထိုးစဥ် ဒေသခံ ပြည်သူ ရှစ်ဦးအားသတ်ဖြတ်ပြီး နေအိမ်၁၅၀ကျော် မီးရှို့ဖျက်ဆီးသွားကြောင်း ဒေသခံများက ပြောသည်။

စစ်ကောင်စီတပ်သည် သြဂုတ် ၂ရက်မှစတင်ကာ ဒီပဲယင်းမြို့နယ်အတွင်း တကျော့ပြန်စစ်ကြောင်း ထိုးခဲ့သည်။

ထို့နောက် ကျေးရွာများရှိ ဒေသခံပြ​ည်သူအချို့အားဖမ်းဆီးသတ်ဖြတ်မှုများ ပြုလုပ်ခဲ့ကြောင်း၊ လျှော်ဖြူကျေးရွာရှိ ဒေသခံတစ်ဦး၊ ယဒင်ကျေးရွာမှ တစ်ဦး၊ ကိုင်းကံကျေးရွာ အနီးရေဆိုးမြောင်း၌ ရုပ်အလောင်း နှစ်လောင်း၊ကိုင်းကံကျေးရွာ မီးလောင်နေအိမ်များအတွင်းက ရုပ်အလောင်း လေး လောင်း လက်တလောတွေ့ရှိထားကြောင်း ​ဒီပဲယင်းမြို့နယ်ညီနောင်များအဖွဲ့က ပြောသည်။

ထို့အပြင် စစ်ကောင်စီတပ်က ကျေးရွာများကိုလည်း မီးရှို့ဖျက်ဆီးမှုများ ပြုလုပ်ခဲ့ပြီး ဘုရားထွက် ကျေးရွာမှ နေအိမ် တစ်လုံး၊ ဘော်ဒါဆောင် တစ်တစ်ခု၊ ဆိုင်ကယ် (၃)စီး၊ အင်ပင်ယဒင်ကျေးရွာ၌ နေအိမ် သုံးလုံး၊ နွားတစ်ကောင်၊ လျှော်ဖြူကျေးရွာမှ နေအိမ် နှစ်လုံး၊ တိုက်ရွာမှ နေအိမ် နှစ်လုံး၊ ကိုင်းကန် ကျေးရွာမှ နေအိမ် ၁၄၅လုံးနှင့် ဆန်စက်အပါအဝင် လယ်ယာသုံးစက်ပစ္စည်း ကား၊ဆိုင်ကယ်၊ စက်ပစ္စည်းများ၊ ဆန်စပါးနှင့် ကောက်ပဲသီးနှံများ မီးလောင်ဆုံးရှုံးခဲ့ကြောင်း ဒီပဲယင်းမြို့နယ်ညီနောင်များအဖွဲ့က ပြောသည်။

Public Service Announcement

ထို့အပြင် စစ်ကောင်စီတပ်သည် လူသားဒိုင်းအဖြစ် ဒီပဲယင်းမြို့နယ်မှ ဒေသခံပြည်သူ ၄၀ဦးနှင့် အရာတော်မြို့နယ်မှ ဒေသခံပြည်သူ ငါးဦး ဖမ်းဆီးခံထားရကြောင်း ဒေသခံများက ပြောသည်။

“လျှော်ဖြူ ကိုင်းကံ စသည့်ကျေးရွာများမှ အဖမ်းဆီးခံရပြည်သူများ ပြန်လည်မလွတ်မြောက်သေးပဲ လူသားဒိုင်းပြုလုပ်ခံနေပါတယ်။ အကြမ်းဖက် ကောင်များဟာ လူသားဒိုင်းပြုလုပ်ပြီး အရာတော်နယ် ကောင်းသစ်ကျေးရွာကို ရောက်ရှိတပ်စွဲထားတယ်လို့သိရပါတယ်။”ဟု ဒီပဲယင်းမြို့နယ် ညီနောင်များ အဖွဲ့က ပြောသည်။

လက်ရှိတွင် အကြမ်းဖက်စစ်ကောင်စီတပ်သည် အရာတော်နယ် စစ်ကြောင်းနှင့် ပေါင်းကာ ဒီပဲယင်းမြို့နယ် လက်လှုပ်တောင်ရွာ မအုန်းဘုန်းကြီးကျောင်းတွင် စခန်းချကာ အနီးဝန်းကျင်အား လက်နက်ကြီးဖြင့် ပစ်ခတ်နေသည်။

စစ်ကောင်စီတပ်သည် ဒီပဲယင်းမြို့နယ်တွင် အိမ်ခြေ ၇၀၀ကျော် မီးရှို့ဖျက်ဆီးထားသည်။

အဆိုပါ နေအိမ်များအနက် ၃၄၆ အိမ်အား တစ်အိမ် ၃၀,၀၀၀ ကျပ်သာ ကူညီနိုင်သေးပြီး ဆက်လက်ကူညီနိုင်ရန် ကြိုးစားနေကြောင်း၊ မီးရှို့ဖျက်ဆီး ခံရသည့် ပြည်သူများအား တတ်နိုင်သမျှ အကူအညီပေးကြရန် ဒီပဲယင်းမြို့နယ် ညီနောင်များအဖွဲ့က မေတ္တာရပ်ခံသည်။