●ဖားကန့် ဆယ်ဇင်း ဒေသ စစ်ကောင်စီတပ်စခန်း ၂ခုကို KIA ဝင်ရောက်တိုက်ခိုက်သိမ်းပိုက်၊စစ်သားနှင့်ပြည်သူ့စစ်သေဆုံးမှုများပြီးလက်နက်ခဲယမ်းများသိမ်းဆည်းရရှိ
စစ်ကိုင်းတိုင်း ဗန်းမောက်မြို့နယ် တောင်ပိုင်းဒေသ တွင် စစ်ကောင်စီတပ် စစ်ကြောင်းကို ကချင်လွတ်လပ်ရေးတပ်မတော်(KIA)နှင့် ပြည်သူ့ကာကွယ်ရေးတပ်(PDF) တို့ ပူးပေါင်း တိုက်ခိုက်ခဲ့ကြောင်း Banmauk Revolution က ဖော်ပြသည်။
ဗန်းမောက် တောင်ပိုင်း ဒယူးတောင်လယ် သက္ကယ်တောင်အနီး၌ စစ်အင်အား ၈၀ ကျော်ခန့်ကို ဩဂုတ် ၇ရက် ညပိုင်းက KIAနှင့် ဒေသ ကာကွယ်ရေးပူးပေါင်းတပ်က လက်နက်ကြီးများဖြင့် စတင်ပစ်ခတ်တိုက်ခိုက်ခဲ့ ခြင်းဖစ်သည်ဟု ဆိုသည်။
အဆိုပါ တိုက်ပွဲအတွင်း စစ်ကောင်စီတပ်ဖွဲ့ဝင်များစွာ သေဆုံးထိခိုက်နိုင်ကြောင်း ဖော်ပြထားပြီး ပူးပေါင်းတပ်ဖွဲ့ဘက်က အထိအခိုက်မရှိဟု အသိပေးထားသည်။
ယမန်နေ့ညပိုင်း (ယနေ့နံနက်အစောပိုင်း)ကလည်း စစ်ကိုင်းတိုင်း နှင့် ကချင် ပြည်နယ် အစပ်ရှိ ဆယ်ဇင်းဒေသမှ စစ်ကောင်စီ၊ ပြည်သူ့စစ်ပူးပေါင်း နေရာယူထားသည့် တပ်စခန်း ၂ခုကို KIAကဝင်ရောက်တိုက်ခိုက် သိမ်းပိုက်ခဲ့ကြောင်း ကချင်ဒေသခံအချို့က ပြောသည်။
စစ်ကောင်စီတပ်နှင့်ပြည်သူ့စစ်များသေဆုံးမှုများပြီးလက်နက်ခဲယမ်းမျာစွာသိမ်းဆည်းရမိကြောင်းလည်း ဒေသတွင်းသတင်းရင်းမြစ်အချို့ကပြောသည်။
“သိမ်းတော့ သိမ်းလိုက်ပြီ။ စခန်း ၂ခု တစ်ပြိုင်တည်း ဝင်တိုက်တာ။ တော်တော်လေး ကျတယ်လို့လည်း ကြားတယ်။ SNA တွေ ပါတယ်။ အခုက ပေါင်းထိုင်ကြတာ ပြည်သူ့စစ်နဲ့ စစ်တပ်နဲ့” ဟု ကချင်ဒေသခံက ပြောသည်။
အဆိုပါ စခန်းသိမ်းတိုက်ခိုက်မှုနှင့်ပတ်သက်၍ မေးမြန်းရန် KIA သတင်းနှင့် ပြန်ကြားရေးဌာန တာဝန်ခံ ဗိုလ်မှူးကြီး နော်ဘူထံသို့ ဆက်သွယ်ရာ အဆက်အသွယ်မရသေးပေ။