မန္တလေးတိုင်း မတ္တရာမြို့နယ်တွင် ဒေသခံပြည်သူ့ကာကွယ်ရေးတပ်(PDF) အဖွဲ့ တစ်ဖွဲ့နှင့် မြို့နယ် ပြည်သူ့ကာကွယ်ရေးအဖွဲ့(ပကဖ) အဖွဲ့ဝင်အချို့ ဖမ်းဆီးခံရပြီးနောက် စစ်ကောင်စီတပ်က ဒေသတွင်းရှိ လူဦးရေ ၃၀ကျော်ကို လိုက်လံဖမ်းဆီးခဲ့ကြောင်း မတ္တရာ PDFနှင့်နီးစပ်သည့် ဒေသခံတစ်ဦးက ပြောသည်။
ပြီးခဲ့သည့် ရက်ပိုင်းအတွင်းက ရဲဘော်အချို့ ဖမ်းဆီးခံရပြီးနောက် ဒေသတွင်း PDF တပ်စွဲရာနေရာ တစ်ခု ဝင်ရောက်စီးနင်းခံရပြီး ရဲဘော်အချို့ ထပ်မံ ဖမ်းဆီးခံခဲ့ရသည်ဟု ဆိုသည်။
ထိုသို့ ဖမ်းဆီးရာတွင် PDF ရဲဘော်များနှင့် အချိတ်အဆက်ရှိသည်ဟု ယူဆခံရများနှင့် အလှူရှင်ဟု ယူဆခံရသူများကို စစ်ကောင်စီတပ်က လိုက်လံဖမ်းဆီးနေခြင်းဖြစ်ကြောင်း ဒေသခံက ပြောသည်။
စစ်ကောင်စီတပ်က ဖမ်းဆီးခံရသူများကို သေဆုံးသွားသည်ဟု သတင်းလွှင့်ခြင်း၊ အဖမ်းမခံရဟု သတင်းလွှင့်ခြင်းများ ပြုလုပ်ပြီး အချိတ်အဆက်များကို လိုက်လံဖမ်းဆီးနေခြင်းဖြစ်သည်ဟု ၎င်း ကဆိုသည်။
Public Service Announcement
