စစ်ကိုင်းတိုင်း၊ ဒီပဲယင်းမြို့နယ်အတွင်း စစ်ကောင်စီတပ်က ယနေ့နံနက်ပိုင်းတွင်လည်း စစ်ကြောင်းထိုးပစ်ခတ်နေ၍ စစ်ကြောင်းဦးတည်ရာ လမ်းတစ်လျှောက်ရှိ ကျေးရွာများမှ ဒေသခံပြည်သူထောင်ချီ ထွက်ပြေး တိမ်းရှောင်နေရကြောင်း ဒေသခံများက ပြောသည်။
စစ်ကောင်စီတပ်သည် ယနေ့(သြဂုတ် ၁၃ရက်)နံနက်ပိုင်းက ဒီပဲယင်းမြို့နယ် အတွင်းရှိ လက်လှုပ်ရွာ၊မူးသစ်ရွာတို့ကို ဝင်ရောက်ပစ်ခတ်ခဲ့သည်။ ထို့နောက် မိချောင်းအိုင်၊ဖုတ္ထန်းတောကျေးရွာ အနီးမှ ဖြတ်၍ လက်ခုပ်ပင် မြောက်အင်း ကျောင်းသို့ရောက်ရှိလာကြောင်း၊ လက်နက်ကြီး၊လက်နတ်ငယ်များဖြင့် အနီးတဝိုက် လှည့်ပတ်ပစ်ခတ်နေကြောင်း ဒေသခံများက ပြောသည်။
အဆိုပါ ရွာများနှင့်အနီးရှိ ရွှေတိုက်ရွာ၊ ဟင်္သာ၊အုပ်ရှင်းကြီး စသည့်ကျေးရွာများက ပြည်သူများပါ ထွက်ပြေးတိမ်းရှောင်နေရကြောင်း ဒီပဲယင်းမြို့နယ်ပြည်သူ့အုပ်ချုပ်ရေးအဖွဲ့က အသိပေးသည်။
စစ်ကောင်စီတပ်သည် ဩဂုတ် ၃ရက်မှစတင်ကာ ဒီပဲယင်းမြို့နယ်တွင် စစ်ကောင်စီတပ်က ကျေးရွာများအား စစ်ကြောင်းထိုးဖျက်ဆီးမှုများ ပြုလုပ်နေပြီး ပြည်သူနှစ်ဦးအား သတ်ဖြတ်ကာ ဒေသခံ၅၀ကျော်ကို လူသားဒိုင်းအဖြစ် ဖမ်းဆီးခေါ်ဆောင်သွားသည်။
Public Service Announcement
အာဏာသိမ်းကာလတစ်လျှောက် စစ်ကောင်စီတပ်က မီးရှို့ဖျက်ဆီးမှုကြောင့် ဒီပဲယင်းမြို့နယ်ရှိ ကျေးရွာ (၃၀) ကျော်မှ ပြည်သူ့နေအိမ် ၁,၅၀၀ကျော် မီးလောင်ဆုံးရှုံးခဲ့ရသည်။
ဒီပဲယင်းမြို့နယ်ညီနောင်များအဖွဲ့သည် တစ်အိမ်လျှင် ၃၀,၀၀၀ ကျပ်နှုံးဖြင့် ကူညီပေးနေပြီး အကူအညီများ လိုအပ်နေကြောင်း ၎င်းအဖွဲ့က ပြောသည်။
