မန္တလေးအိုးဘိုထောင်မှာ အစာငတ်ခံဆန္ဒပြမှုကြောင့် တိုက်ပိတ်ခံထားရတဲ့ ရန်ကုန်ပညာရေးတက္ကသိုလ်ကျောင်းသားများသမဂ္ဂ ဥက္ကဋ္ဌဟောင်း ကိုနောင်ထက်အောင်ကို ရုံးထုတ်စစ်ဆေးတာမျိုးမလုပ်ဘဲ မျက်ကွယ်မှာ စစ်ကောင်စီက ထောင်ဒဏ် ၃ နှစ်ချလိုက်ပါတယ်။
ကိုနောင်ထက်အောင်ကို မတည်မငြိမ်ဖြစ်အောင် လှုံဆော်မှု ရာဇသတ်ကြီးပုဒ်မ ၅၀၅ (က) နဲ့ စစ်ကောင်စီက ထောင်ချလိုက်တာပါ။
ဒီမိုကရေစီအရေးတက်ကြွလှုပ်ရှားသူတွေကို စစ်ကောင်စီက သေဒဏ်စီရင်တဲ့အပေါ် ကန့်ကွက်တဲ့အနေနဲ့ ကိုနောင်ထက်အောင်ဟာ အိုးဘိုထောင်ထဲမှာအစာငတ်ခံဆန္ဒပြမှုကြောင့် တိုက်ပိတ်ခံထားရတယ်လို့သိရပါတယ်။
အစာငတ်ခံဆန္ဒပြပွဲကိုဦးဆောင်တယ်ဆိုကာ ကိုနောင်ထက်အောင်ကို ရိုက်နှက်တာတွေရှိခဲ့ပြီး ဦးခေါင်း၊ကျောကုန်းအပါအဝင် ဒဏ်ရာဒဏ်ချက်တွေရခဲ့ပေမယ့် ထောင်အာဏာပိုင်တွေဟာ ဆေးကုသခွင့်မပေးဘူးလို့ ဗကသများအဖွဲ့ချုပ်ကလည်း သတင်းထုတ်ပြန်ထားပါတယ်။