တော်လှန်ရေးကာလအတွင်း တရားဥပဒေ စိုးမိုးရေးအားနည်းခြင်းကို အခွင့်ကောင်းယူကာ ပြည်သူများကို မထီမဲ့မြင်ပြုခြင်း၊ အာဏာရှင်ဆန်ဆန် ပြုမှုခြင်းများကို တွေ့ရသည့်အတွက် ထို့သို့ဆောင်ရွက်သူ၊ ပါဝင်ပတ်သက်သူ များကို နောင်အလားတူကိစ္စမျိုးဆောင်ရွက်ပါက တည်ဆဲဥပဒေ၊ သက်ဆိုင်ရာဥပဒေများဖြင့် ပြင်းပြင်းထန်ထန် အရေးယူဆောင်ရွက်သွားမည်ဟု ချင်းကာကွယ်ရေးတပ်(CDF) ဟားခါးကောင်စီက အသိပေး ထုတ်ပြန်သည်။
Chinland Defense Force – Hakha Councilမှ စီမံအုပ်ချုပ်နေသည့် ဟားခါးမြို့နယ်၊ နယ်နိမိတ် သည် ၂၀၂၁ ဇန်နဝါရီလ အာဏာမသိမ်းမီကာလအထိ တည်ရှိသောနယ်နိမိတ်အတိုင်း ဆက်လက်တည်ရှိ၍ ကျေးရွာအုပ်စုနယ်နိမိတ်၊ ကျေးရွာနယ်နိမိတ်တို့သည်လည်း ထိုနည်းတူစွာ မပြောင်းလဲဘဲ ဆက်လက်တည်ရှိသည်ဟု ထုတ်ပြန်ချက်၌ ဖော်ပြထားသည်။
အချို့သော လူပုဂ္ဂိုလ်၊ အဖွဲ့အစည်း၊ ကျေးရွာများသည် မိမိကိုယ်ကျိုး အတွက်သော်လည်းကောင်း၊ နယ်မြေအေးချမ်းမှု ပျက်ပြားစေရန်သော် လည်းကောင်း၊ တော်လှန်ရေး နှောင်းနှေးကြန့်ကြာ စေရန် သော်လည်းကောင်း ရည်ရွယ်၍ အကြောင်းအမျိုးမျိုးပြကာ ကျုးကျော်ခြင်း၊ တောင်ယာခုတ်ခြင်း၊ သစ်၊ ထင်း၊ မီးသွေးများခိုးထုတ်ခြင်း၊ ပြည်သူများကို ခြိမ်းခြောက်ခြင်းများ လုပ်ဆောင်နေရာ ဆက်လုပ်ပါက အရေးယူမည်ဟု အသိပေးခဲ့သည်။
