ရန်ကုန်မှာမိုးကြီးပြီး ရေကြီးရေလျှံမှုတွေဖြစ်ပေါ်နေ

မနေ့ကညပိုင်းကစတင်ပြီး မိုးအဆက်မပြတ်ရွာသွန်းတာကြောင့် ရန်ကုန်က နေရာအများစုမှာ ဒီနေ့မနက်ပိုင်း ရေကြီးရေလျှံမှုတွေဖြစ်နေပါတယ်။

ရန်ကုန်ရဲ့အဓိကလမ်းမကြီး ဖြစ်တဲ့ ပြည်လမ်းမကြီးနဲ့ကမ္ဘာအေးဘုရားလမ်းမကြီးတို့ရဲ့အချို့နေရာတွေမှာပါ ရေလျှံမှုတွေဖြစ်နေတယ်လို့ ဖြတ်သန်းသွားလာခဲ့ကြသူတွေကပြောပြကြပါတယ်။

မြို့နယ်တွေမှာဆိုရင်လည်း ရပ်ကွက်တွေထဲက လမ်းတွေ ရေမြှုပ်တာ ၊နေအိမ်တွေထဲရေဝင်လာတာတွေဖြစ်ပေါ်နေပါတယ်။

တောင်ဒဂုံ ၊ ရွှေပြည်သာ၊လှိုင်သာယာ ၊အင်းစိန် မြို့နယ်တွေအပြင် တာမွေ၊မင်္ဂလာတောင်ညွှန့်၊တောင်ဥက္ကလာပ မြို့နယ်တွေမှာပါ ရေကြီးရေလျှံနေပါတယ်။

Public Service Announcement

ယာဉ်အသွားအလာများတဲ့ ဝေဇယန္တာ လမ်းမရဲ့ လမ်းပိုင်းအချို့မှာ ရေကြီးနေတာကြောင့် ယာဉ်တွေပိတ်ဆို့နေတယ်လို့သိရပါတယ်။

ဒီရက်ပိုင်းအတွင်း မုတ်သုံလေဖိအားနည်းရပ်ဝန်းတစ်ခု ဘင်္ဂလားပင်လယ်အော်မှာဖြစ်ပေါ်နေတဲ့အတွက် ရန်ကုန် ၊ရခိုင်နဲ့မွန်ပြည်နယ်တွေမှာ မိုးကြီးပြီးရေကြီးရေလျှံမှုတွေဖြစ်နိုင်တယ်လို့ NUG ရဲ့လူသားချင်းစာနာထောက်ထားရေးနဲ့ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာနက အသိပေးထုတ်ပြန်ထားပါတယ်။