■ပလက်ဝမြို့နယ်တိုက်ပွဲတွင်လည်းစစ်ကောင်စီတပ် ၁၀ဦးသေဆုံးသဖြင့် တစ်ရက်တည်း ၂၉ ဦးသေ
ရခိုင်-ဘဂ်လားနယ်စပ်ရှိ စစ်ကောင်စီလက်အောက်ခံ မိုင် တိုင် အမှတ် (၄၀)စခန်းအား စခန်းသိမ်းတိုက်ပွဲဆင်နွှဲခဲ့ရာ စစ်ကောင်စီတပ်မှ အရာရှိအပါအဝင် (၁၉)ဦးသေ ဆုံးပြီး စခန်းနှင့်အတူ လက်နက်ခဲယမ်းအများအပြား သိမ်းပိုက်ရရှိခဲ့ကြောင်း ရခိုင့်တပ်တော် AA က ယနေ့(သြဂုတ် ၃၁) ညတွင် ထုတ်ပြန်လိုက်သည်။
အဆိုပါအမှတ် (၄၀)စခန်းကို ယနေ့နံနက်တွင် စတင်ထိုးစစ်ဆင်ခဲ့ပြီး နံနက်၉ နာရီ ၁၂ မိနစ်တွင် အပြီးသတ်သိမ်းပိုက်နိုင်ခဲ့ခြင်းဖြစ်ကာ တိုက်ပွဲအတွင်း ရခိုင့်တပ်တော်မှ စစ်သည်အချို့ ကျဆုံးမှုရှိခဲ့သည်ဟုဆိုသော်လည်း အရေအတွက်အား ဖော်ပြမထားပေ။စစ်ကောင်စီဘက်မှ ဒဏ်ရာအပြင်းအထန်ရရှိထားသော တပ်ကြပ် သက်ကိုဦးမှအပ ကျန် ၁၉ဦး စလုံးသေဆုံးခဲ့ကြောင်းအမည်စာရင်း၊ရာထူးနှင့်တစ်ကွ AA ကအတိအကျအသိပေးထားသည်။
ယင်းစခန်း ပတ်ဝန်းကျင်၌ တိုက်ပွဲများစတင်ဖြစ်ပွားနေခဲ့သည်မှာ သြဂုတ် ၂ ရက်ကတည်းကဖြစ်ပြီး အဆိုပါနေရာအပါအဝင် ပလက်ဝဒေသနှင့် အခြားနေရာများ၌ ရက်ဆက်တိုက်ပွဲများဖြစ်ပွားကာ ယခုဆိုလျှင်တစ်လနီးပါးအထိ ကြာမြင့်ခဲ့ပြီဖြစ်ကြောင်း ဖော်ပြသည်။
ထို့အပြင် နယ်စပ်မိုင်တိုင် အမှတ် (၃၇)မှ မိုင်တိုင် (၄၀) ပတ်ဝန်းကျင်အပြင် ဝေလာတောင်တန်းပေါ်၌ ရန်သူ့ဖက်မှ မိမိတို့အား ပိတ်ဆို့ဖြတ်တောက်ထားသည့်နည်းတူ မိမိတို့ဖက်မှလည်း ရန်သူ့စခန်းအချို့အား ၎င်းတို့နည်းတူ ပိတ်ဆို့ဖြတ်တောက်ထားသည့် အခင်းအကျင်းဖြစ် ကြောင်း အသိပေးသည်။
Public Service Announcement
ရန်သူသည် တစ်ရက်လျှင် လက်နက်ကြီး အရေအတွက် ခန့်မှန်း (၃၀၀/၄၀၀) အား ခမောင်းဆိပ်၊ မိုင်တိုင်အမှတ် (၃၄)၊ (၃၈)၊ နခခ (၇) ကြိမ်ချောင်းဗျူဟာ၊ မိုင်တိုင်အမှတ် (၃၈) နှင့် (၃၉) အကြားနေရာများ အပါအဝင် အနီးအနားရှိ ၎င်းတို့၏ တပ်စခန်းများမှ လက်နက်ကြီးများကို နေ့တိုင်းနီးပါး ပစ်ခတ် တိုက်ခိုက်နေသည့်အပြင် ယခုရက်များအတွင်း ရဟတ်ယာဉ်၊ ဂျက်တိုက်လေယာဉ်များဖြင့်ပါ ဗုံးကြဲ တိုက်ခိုက်နေသည့် ကြားမှ ရက္ခိုင့်တပ်တော်က စစ်ကောင်စီ၏ မိုင်တိုင်အမှတ် (၄၀) အနီးရှိ အဆိုပါ အထိုင်ချ အခိုင်အမာစခန်းအား လက်တုံ့ပြန်သည့်အနေဖြင့် တိုက်ခိုက်ခဲ့သည်ဟု ဆိုသည်။
“ဤစခန်းသည် ရက်ပေါင်းများစွာ အပြန်အလှန်တိုက်ပွဲဖြစ်ပွားနေသော နေရာများထဲမှ တစ်ခုဖြစ်သည်”ဟု ဖော်ပြသည်။
▪︎စစ်ကောင်စီတပ်ကြောင့် ပြည်သူများသေဆုံး၍လက်တုံ့ပြန်ရန်AA ကစခန်းသိမ်းတိုက်ပွဲဖော်
မြောက်ဦးအခြေစိုက် ခမရ (၃၇၇)၊ ခမရ (၃၇၈)၊ ခမရ (၅၄၀)တို့အပြင် ၎င်းတို့တပ်စွဲ ထားသော တိမ်ညို၊ သင်းကျိုက်တောင်၊ လင်းမြီတောင် စသည့်နေရာများမှ မြောက်ဦးမြို့နယ် အတွင်းရှိ ကင်းဆိပ်၊ ဘူးရွက်မညှိုး၊ အောက်သကန်၊ ကူးတို၊ ချောင်းနား၊ လက္ကာ၊ ဝေသာလီ စသည့်ရွာများသို့ ရည်ရွယ်ချက်ရှိရှိ တမင်တကာ လက်နက်ကြီးဖြင့် ပစ်ခတ် တိုက်ခိုက်ခဲ့သောကြောင့် အသက် (၅)နှစ်အရွယ် မောင်မြတ်သူလင်း အပါအဝင် ဦးလှအောင်သိန်း(အသက် ၃၈ နှစ်)၊ ဒေါ်အေးယဉ်နု (အသက် ၆၉ နှစ်) တို့ လက်နက်ကြီးကျည်ထိမှန်သေဆုံးခဲ့ပြီး ဒဏ်ရာရရှိသူ (၉) ဦးအထိရှိခဲ့ရာ ယင်းဖြစ်စဉ်အ ပေါ်ချက်ချင်း လက်တုံ့ပြန်သည့်အနေဖြင့် မိုင်တိုင်အမှတ် (၄၀) စခန်းအား တိုက်ခိုက် သိမ်းပိုက်ခဲ့ခြင်းဖြစ်သည်ဟုဖော်ပြထားသည်။
မိုင်တိုင်အမှတ်(၄၀) တိုက်ပွဲအတွင်း စစ်ကောင်စီတပ်ဖွဲ့ဝင်များထဲမှ ပြင်းထန်ဒဏ်ရာရရှိပြီး လောလောဆယ် အသက်မသေသေးသော ဒုတပ်ကြပ် သက်ကိုဦး တစ်ယောက်မှလွဲ၍ ရဲအုပ် စိုးစိုးပိုင် အပါအဝင် စုစုပေါင်း (၁၉) ယောက်သေဆုံးခဲ့ပြီး လက်နက် ခဲယမ်း၊ စစ်အသုံးအဆောင်ပစ္စည်အမြောက်အများကို မိမိတို့မှ သိမ်းဆည်းရမိခဲ့ကြောင်း ဖော်ပြသည်။
စခန်းအားသိမ်းပိုက်နိုင်ချိန်တွင် သေဆုံးစစ်ကောင်စီတပ်ရုပ်အလောင်းအများအပြားကို စခန်းအတွင်းမြှပ်နှံထားသည်ကို တွေ့ရှိရသည်ဟု ဆိုသည်။
“မိမိတို့ဖက်မှလည်း ဤစခန်းသိမ်းတိုက်ပွဲအတွင်း အထိအခိုက်၊ အကျအဆုံး တချို့ရှိခဲ့သည်”ဟု ရခိုင့်တပ်တော် AA က အသိပေးသည်။
ထိုအပြင်ယနေ့ သြဂုတ် ၃၁ ရက်၊ နေ့လယ် (၂) နာရီ (၄၀) မိနစ်အချိန်၌လည်း ပလက်ဝမြို့နယ်၊ မြိတ်ဝကျေးရွာ၏ အနောက်ဖက် မီတာ (၅၀၀) ခန့်အကွာအဝေးတွင် တိုက်ပွဲဖြစ်ပွားခဲ့ပြီးရန်သူ့ဖက်မှ (၁၀) ဦး မျက်မြင်ကျဆုံးခဲ့ကာ တိုက်ပွဲမှာ ညနေ (၅) နာရီအထိနှစ်ဖက်အပြန်အလှန် တိုက်ခိုက်မှုများနှင့်အတူ ဆက်လက်ရှိနေခဲ့သည်ဟုလည်း ဖော်ပြသည်။
အာရက္ခတိုင်းပြည်နှင့် လူမျိုးအတွက် အသက်ပေးဆပ်စွန့်လွှတ်ခဲ့ရသော အာရက္ခစစ်သည်တော်များ ၊ ထူးချွန်မြောင်မြောက်စွာတိုက်ပွဲဝင်ခဲ့သော အာရက္ခစစ်သည်တော်များကို မှတ်တမ်းတင်ဂုဏ်ပြုအပ်ပါသည်ဟု ထုတ်ပြန်ထားသည်။
