ကရင်အမျိုးသားလွတ်မြောက်ရေးတပ်မတော်(KNLA) အမှတ်(၅)တပ်မဟာထံ စစ်ကောင်စီတပ်သားတစ်ဦး လက်နက်ခဲယမ်းနဲ့ အလင်းဝင်ရောက်လာတယ်လို့ တပ်မဟာ(၅)က သတင်းထုတ်ပြန်ပါတယ်။
စစ်ကောင်စီရဲ့ စကခ(၈)လက်အောက်ခံတပ်ရင်းဖြစ်တဲ့ ခရမ(၅၉၃)က အသက်(၂၅)နှစ်ရှိ တပ်သားမောင်သန့်ဇင်အောင်ဟာ (MA-3) သေနတ်တစ်လက်၊ ကျည်(၁၇၀)တောင့်နဲ့ လက်ပစ်ဗုံးတစ်လုံးယူဆောင်လာခဲ့ပြီး ကော်သူးလေ၊ မူတြော်(ဖာပွန်)ခရိုင် KNLA တပ်မဟာ(၅)ထံ အလင်းဝင်ရောက်လာခဲ့တယ်လို့ တပ်မဟာ(၅)တာဝန်ရှိသူတစ်ဦးက ပြောပါတယ်။
အလင်းဝင်ရောက်လာတဲ့ စစ်ကောင်စီတပ်သား မောင်သန့်ဇင်အောင်ကို KNLA တပ်မဟာ(၅)တာဝန်ရှိသူတွေက ကောင်းမွန်စွာလက်ခံကြိုဆိုစောင့်ရှောက်တဲ့အပြင် ဆုငွေ ကျပ်(၂၀၀၀၀၀၀)တိတိ ဆုချခဲ့တယ်လို့ တပ်မဟာ(၅)တာဝန်ရှိသူတစ်ဦးက ပြောပါတယ်။
အဆိုပါစစ်ကောင်စီတပ်သာ မောင်သန့်ဇင်အောင်ဟာ တပ်ကနေထွက်ပြေးလာရတဲ့အကြောင်းရင်းနဲ့ပတ်သက်ပြီး တပ်တွင်းမှာအမှုထမ်းဆောင်နေတဲ့အချိန်မှာ အထက်အရာရှိတွေက လက်အောက်ငယ်သားတွေအပေါ် မတရားဖိနှိပ်ချုပ်ချယ် ခွဲခြားဆက်ဆံပြီး ရှေ့တန်းထွက်တဲ့အချိန်မှာလည်း အစားအစာ ၀၀လင်လင်မစားရဘဲ အထက်အရာရှိတွေကသာ စားချင်တာစားလို့ရတဲ့အပေါ် မခံနိုင်လို့ ထွက်ပြေးဖို့ဆုံးဖြတ်ခဲ့တာဖြစ်တယ်လို့ ပြောပါတယ်။
Public Service Announcement
“ကျနော်တို့ကတော့ တစ်ရက်ထမင်းစားတယ်။ နောက်တစ်ရက်မှာ ဆန်ပြုတ်စားရတယ်။ ကျနော်မခံနိုင်တော့လို့ ထွက်ပြေးဖို့ဆုံးဖြတ်ခဲ့တယ်။ ကျနော် တပ်မဟာ(၅)ရောက်တော့ အရာရှိရော ရဲဘော်တွေရော ကျနော့်ကို ညီအစ်ကိုမောင်နှမလိုပဲ ဆက်ဆံတယ်၊ မခွဲခြားဘူး၊ အဝတ်အစားတွေဝယ်ပေးတယ်၊ ထမင်းလည်းအ၀စားရတယ်၊ ကျနော်ဝမ်းလည်းသာတယ်၊ ကျေနပ်တယ်ပျော်တယ်”လို့ သူက ဆိုပါတယ်။
အလင်းဝင်လာတဲ့ စစ်ကောင်စီတပ်သားဟာ ရှေ့ဆက်ပြီး တပ်မဟာ(၅)ကနေတစ်ဆင့် ထိုင်းနိုင်ငံဘက်ကို အလုပ်သွားလုပ်ပြီး အလုပ်ကနေတစ်ဆင့် ငွေတွေစုကာ အမေဖြစ်သူကို ပြန်လည်ထောက်ပံ့ပေးသွားမယ်လို့ ပြောတဲ့ကြောင်း ထုတ်ပြန်ချက်မှာဖော်ပြထားပါတယ်။
စစ်ကောင်စီတပ်သားရဲ့ ရှေ့ဆက်ရည်မှန်းချက်နဲ့ပတ်သက်ပြီး ကေအဲန်ယူ-မူတြော်ခရိုင်တာဝန်ရှိသူတွေအနေနဲ့ သေသေချာချာစီမံဆောင်ရွက်ပေးနေတယ်လို့လည်း ခရိုင်တာဝန်ရှိသူတစ်ဦးက ပြောကြားခဲ့ပါတယ်။
