ကုလသမဂ္ဂအထွေထွေညီလာခံဖွင့်ပွဲကို သံအမတ်ကြီးဦးကျော်မိုးထွန်းတက်ရောက်

▪︎မြန်မာကိုယ်စားပြုခွင့်ကို သံအမတ်ကြီးဦးကျော်မိုးထွန်းဆက်လက်ရရှိလိမ့်မည်ဟု NUG ၀န်ကြီးပြော

၇၇ ကြိမ်မြောက်ကုလသမဂ္ဂအထွေထွေညီလာခံဖွင့်ပွဲအခမ်းအနားကို မြန်မာသံအမတ်ကြီးဦးကျော်မိုးထွန်းတက်ရောက်ခဲ့ကြောင်း NUG ပြည်ထောင်စုဝန်ကြီးတစ်ဦးကပြောသည်။

မြန်မာစံတော်ချိန် ယမန်နေ့(စက်တင်ဘာ ၁၃ည)တွင်ကျင်းပခဲ့သော ၇၇ ကြိမ်မြောက် ကုလသမဂ္ဂအထွေထွေညီလာခံဖွင့်ပွဲကို အစီအစဥ် ၄ ရပ်ပါဝင်ပြီး လာမည့် တစ်နှစ်တာ ကုလသမဂ္ဂအထွေထွေညီလာ ခံကို တက်ရောက်ခွင့်ရရှိရေးအတွက် အဆုံးအဖြတ်ပြုမည့် Credentials Committee အဖွဲ့၀င်နိုင်ငံစာရင်းကို ကြေညာခဲ့သည်။

Credentials Committee တွင် တရုတ်၊ အမေရိကန်၊ ရုရှားတို့က အမြဲတမ်းအဖွဲ့ဝင်နိုင်ငံများဖြစ်ပြီး ယခုနှစ် ကျန်အဖွဲ့ဝင်နိုင်ငံ ၆ နိုင်ငံမှာ အန်ဂိုလာ၊ သြစတြီးယား၊ ရ၀မ်နာ၊ ဥရုဂွေး၊ မော်လ်ဒိုက်ဗ်၊ ဇမ်ဘီယာ တို့ဖြစ်သည်။

ကုလသမဂ္ဂ၏လုပ်ထုံးလုပ်နည်းများအရ အထက်ပါ အဖွဲ့၀င် ၉ နိုင်ငံပါ အရည်အချင်းစစ်ကော်မတီက ကုလသမဂ္ဂကိုယ်စားပြုခွင့်အတွက် အပြိုင်တင်သွင်းလာသော နိုင်ငံများရှိပါက ယင်းနိုင်ငံများအတွက် မည်သူ့အား ကိုယ်စားပြုခွင့်ပေးမည်ကို အဆုံးအဖြတ်ပြုပေးရသည်။ ကော်မတီအဖွဲ့ဝင်နိုင်ငံများအကြား သဘောကွဲလွဲမှုရှိပါက ကုလသမဂ္ဂအထွေထွေညီလာခံ၌ မဲခွဲဆုံးဖြတ်ကာအတည်ပြုချက်ရယူသည်။

Public Service Announcement

ပြီးခဲ့သည့်နှစ်တွင် စစ်တပ်အာဏာသိမ်းမှုကြောင့်အရပ်သားအစိုးရက ခန့်အပ်သော သံအမတ်ကြီးဦးကျော်မိုးထွန်းသည် တရားမ၀င်စစ်အာဏာသိမ်းမှုကို ဆန့်ကျင်ကန့်ကွက်ကာ မြန်မာပြည်သူများနှင့် တသားတည်းရပ်တည်ခဲ့သည်။

၇၆ကြိမ်မြောက်အထွေထွေညီလာခံတွင်မြန်မာနိုင်ငံအတွက် တရားမဝင်အာဏာသိမ်းစစ်ကောင်စီကလည်းအပြိုင်လျှောက်ထားမှုရှိခဲ့ရာ အရည်အချင်းစစ်ကော်မတီက မြန်မာနိုင်ငံ၏အပြိုင်လျှောက်ထားမှုကိုတစ်နှစ်ရွှေ့ဆိုင်းခဲ့ကာတည်ဆဲသံအမတ်ကြီး ဦးကျော်မိုးထွန်းကို ဆက်လက်ကိုယ်စားပြုခွင့်ပေးခဲ့သည်။ တနည်းအားဖြင့် ယင်းဆုံးဖြတ်ချက်သည် အာဏာသိမ်း စစ်တပ်၏ ကိုယ်စားပြုခွင့် လျှောက်ထားချက်ကို ငြင်းပယ်လိုက်ခြင်းဖြစ်သည်။

ယခုနှစ်တွင်လည်း မြန်မာနိုင်ငံကိုယ်စားပြုအတွက် အထက်ပါ ၉ နိုင်ငံပါ၀င်သော အရည်အချင်းစစ်ကော်မတီက မည်သို့ဆုံးဖြတ်မည်ကိုလာမည့်လပိုင်းအတွင်းသိရှိရမည်ဖြစ်သည်။

အမျိုးသားညီညွတ်ရေးအစိုးရ NUG ပြည်ထောင်စု၀န်ကြီးတစ်ဦးကမူ မြန်မာနိုင်ငံကိုယ်စားပြုအတွက်လက်ရှိသံအမတ်ကြီး ဦးကျော်မိုးထွန်းသာ ဆက်လက်ရရှိကာ အဆင်ပြေလိမ့်မည်ဟု မှတ်ချက်ပြုသည်။

မြန်မာပြည်သူများ၊ ပြည်တွင်း၊ ပြည်ပ အရပ်ဘက်အဖွဲ့အစည်း ၃၅၈ ဖွဲ့နှင့် ကုလသမဂ္ဂကျွမ်းကျင်သူများဖြင့် ဖွဲ့စည်းထားသည့် SAC-M တို့က ကုလသမဂ္ဂ အဖွဲ့ဝင်နိုင်ငံများအနေဖြင့် သံ အမတ်ကြီး ဦးကျော်မိုးထွန်းကိုသာ ဆက်လက်အသိအမှတ်ပြုလက်ခံရန် တိုက်တွန်းတောင်းဆိုထားကြသည်။