▪︎စစ်ကောင်စီသတ်မှတ်နှုန်းဖြင့်ရောင်းပေးသောကောင်တာမရှိဘဲယခုကဲသို့အရေးယူခြင်းမှာ ကျပ်ငွေတန်ဖိုးကျဆင်းခြင်းအပေါ် ငွေလဲကောင်တာများအပေါ်အပစ်ပုံချမှုဟုလုပ်ငန်းရှင်များပြော
ဒေါ်လာလဲနှုန်းကိုပြင်ပဈေးထက်များစွာလျှော့ဖွင့်ထားသောစစ်ကောင်စီ၏ ဗဟိုဘဏ်ကသတ်မှတ်ဈေးအတိုင်းမရောင်း၍ဟုဆိုကာ ငွေလဲကောင်တာအချို့အား လိုင်စင်ကိုသုံးလ ရပ်ဆိုင်းကြောင်း ယမန်နေ့(စက်တင်ဘာ ၁၆ )ကထုတ်ပြန်သည်။
ပြည်ပပေါက်ဈေးတွင် တစ်ဒေါ်လာကို ကျပ် ၅၀၀၀ ခန့်အထိစံချိန်တင်မြင့်တက်လာပြီးနောက် ငွေလဲကောင်တာအချို့ကို အပြစ်ပုံချ၍ စစ်ကောင်စီဗဟိုဘဏ်က ယခုကဲ့သို့ အရေးယူခြင်းဖြစ်ကြောင်းငွေလဲကောင်တာပိုင်ရှင်အချို့ကပြောသည်။
“ဈေးကွက်ကို အာဏာနဲ့ထိန်းချုပ်ဖို့ ကြိုးစားတာ။ဈေးကွက်သဘောအရမို့ သူတို့က ခြိမ်းခြောက်တာက အလုပ်ဖြစ်မယ် မထင်ဘူး”ဟုငွေလဲကောင်တာပိုင်ရှင်တစ်ဦးကပြောသည်။
စီးပွားရေးလုပ်ငန်းရှင်တစ်ဦးကလည်း “စစ်ကောင်စီက ဗဟိုဘဏ်က ရှေ့နောက် မဆီလျှော်တာပါ။ သူတို့သတ်မှတ်တာ ၂၁၀၀ကျပ်ကို အမြင့်ဆုံး ၂၁၀၆ကျပ်ပဲရောင်းရမယ်သတ်မှတ်ထားတယ်။ ဒါပေ့မယ် သူတို့ ထုတ်ရောင်းတဲ့ ရွှေဒင်္ဂါးကျတော့ တစ်ဒေါ်လာ ၃၂၀၀နဲ့တွက်ရောင်းတယ်။ နောက်ပြီး သင်္ဘောသားလစာတွေကို တစ်ဒေါ်လာ ကျပ် ၃၀၀၀နဲ့ ဝယ်မယ်ဆိုတယ်။ သူတို့ကိုယ်တိုင်က အမိန့်တွေကို အမျိုးမျိုးထုတ်ပြီး သူတို့ဘဲ မလိုက်နာကြတာ၊ ဒါကို ငွေလဲကောင်တာတွေကို အပြစ်လွှဲချနေတာ”ဟုသုံးသပ်ပြောကြားသည်။
Public Service Announcement
စစ်ကောင်စီ၏ ဗဟိုဘဏ်က ၁ ဒေါ်လာလျှင် ၂၁၀၀ ကျပ်သတ်မှတ်ထားပြီး ထိုနှုန်း၏ ၀ ဒသာမ ၃ ရာခိုင်နှုန်းသာအတိုးအလျှော့ ပြုလုပ် (၂၀၉၄ ကျပ် မှ ၂၁၀၆ ကျပ်အတွင်းသာ)ရောင်းချခွင့်ပြုထားသည်။ ထိုကြောင့်ငွေလဲကောင်တာများတွင် စစ်ကောင်စီသတ်မှတ်သောနှုန်းဖြင့် လာရောင်းသူရှိလျှင်သာဝယ်ပြီး သတ်မှတ်ပေးသာနှုန်းဖြင့်ပြန်ရောင်းပေးသော ငွေလဲကောင်တာမရှိပေ ။
စစ်ကောင်စီသတ်မှတ်နှုန်းဖြင့် ရောင်းပေးသောငွေလဲကောင်တာ မရှိပါဘဲစစ်ကောင်စီက Family Moe Paingကုမ္ပဏီက ဖွင့်လှစ်ထားသောကောင်တာများသည် ညွန်ကြားချက်ကို မလိုက်နာဟုဆိုကာ ကောင်တာ ငါးခုအားစက်တင်ဘာ ၁၉ ရက်မှစ၍ လိုင်စင်ကို ၃ လ ရပ်ဆိုင်းသည်ဟု စစ်ကောင်စီဗဟိုဘဏ်ကဆိုသည်။
ပြီးခဲ့သည့် ဩဂုတ်လ တတိယအပတ်တွင် ကျပ်ငွေတန်ဖိုး စံချိန်တွင် ကျဆင်းပြီး တစ်ဒေါ်လာကို ကျပ် ၅၀၀၀ အထိ စံချိန်တင်မြင့်တက်ခဲ့ပြီး စက်တင်ဘာလဆန်းပိုင်းတွင် ပြန်လည်ကျဆင်းခဲ့သည်။
လက်ရှိတွင်အမေရိကန်တစ်ဒေါ်လာလျှင် ၃၄၀၀ကျပ်ဝန်းကျင်ပေါက်ဈေးရှိနေပြီး စစ်ကောင်စီက တစ်ဒေါ်လာကို ကျပ် ၂၁၀၀ သာ သတ်မှတ်ထားသည်။
