မိုးညှင်းမြို့နယ်မှ ပြည်နယ်လွှတ်တော်ကိုယ်စားလှယ် ဦးမျိုးကျော် စစ်ကောင်စီ၏ စစ်ကြောရေးစခန်းတွင် သေဆုံးသွားပြီးနောက် မိသားစုဝင်များ ရုပ်အလောင်းပြန်မရခဲ့သလို မည်သည့်နေရာတွင် သင်္ဂြိုလ်သည်ကိုလည်း မသိရသေးကြောင်း ဒီချုပ်ပါတီကိုယ်စားပြု လွှတ်တော်အမတ်အချို့က ပြောသည်။
မိုးညှင်းမြို့နယ်မဲဆန္ဒနယ်အမှတ်(၂)၊ပြည်နယ်လွှတ်တော် ကိုယ်စားလှယ်ဦးမျိုးကျော်ကို စစ်ကောင်စီတပ်က ပြီးခဲ့သည့် သြဂုတ်အတွင်း ဖမ်းဆီးခဲ့ခြင်းဖြစ်သည်။ ယခုအခါ စစ်ကောင်စီစစ်ကြောရေးစခန်းတွင် သေဆုံးသွားပြီဟု မိုးကောင်းမြို့နယ် ပြည်သူ့လွှတ်တော်ကိုယ်စားလှယ်နှင့် ပြည်ထောင်စုလွှတ်တော် ကိုယ်စားပြုကော်မတီ CRPH အဖွဲ့ဝင် ဦးဝင်းနိုင်က လူမှုကွန်ရက်မှတဆင့် အသိပေးထားသည်။
ဦးမျိုးကျော်၏ သေဆုံးသည့်သတင်းနှင့်ပတ်သက်၍ ” စကစရဲ့ ညှဉ်းပန်းနှိပ်စက်မှုများကြောင့် စစ်ကြောရေးစခန်းမှာ ကွယ်လွန်ကြောင်း ခိုင်လုံသောသတင်းရင်းမြစ်တခုမှ သိရပါတယ်။မိသားစုအနေနဲ့ dead body ပြန်မရတဲ့အပြင် ကွယ်လွန် ကြောင်းအသိပေးအကြောင်းကြားခြင်းပင်မရှိကြောင်းသိရပါတယ်”ဟု ဦးဝင်းနိုင်က ယမန်နေ့(စက်တင်ဘာ ၂၁ရက်)ညတွင် ရေးသားထားသည်။
ဦးမျိုးကျော်နှင့် ဖားကန့်သပိတ်ခေါင်းဆောင်တစ် ဦးကို မြစ်ကြီးနားမြို့နယ် (၂၁)မိုင်စုပေါင်းဂိတ်တွင် စစ်ကောင်စီတပ်က သြဂုတ် ၂၄ရက်တွင် ဖမ်းဆီးသွားခြင်းဖြစ်သည်။ ဖမ်းဆီးခံရသူနှစ်ဦးစလုံး သတင်းအစအနပျောက်နေရာမှ တစ်လနီးပါးအကြားတွင် ဦးမျိုးကျော်သေဆုံးကြောင်းသတင်းထွက်ပေါ် လာခြင်း ဖြစ်သည်။
“သူ(ဦးမျိုးကျော်)ကလူငယ်တစ်ဦး။ သိပ်တော် တာ။ စစ်ကောင်စီကို အံတုပြီး နိုင်ငံတော်အတွက် အသက် ပေးသွားတာ”ဟု စစ်အာဏာရှင်ဆန့်ကျင်ရေးလှုပ်ရှားနေသော မိုးညှင်းမြို့ခံတစ်ဦးက ပြောသည်။
အမျိုးသား ဒီမိုကရေစီအဖွဲ့ချုပ် လူ့အခွင့်အရေးချိုးဖောက်မှုများ မှတ်တမ်းကောက်ယူရေး အဖွဲ့ (NLD-HRDT) ၏ ကောက်ယူရရှိသောစာရင်းများအရ၂၀၂၁ ဖေဖော်ဝါရီမှ ၂၀၂၂ မေအထိစစ်ကောင်စီတပ်က ဖမ်းဆီးပြီး စစ်ကြောရေးတွင်နှိပ်စက်ညှင်းပန်းမှုနှင့် ကျန်းမာရေးစောင့်ရှောက်မှုမလုံလောက်၍ သေဆုံးခဲ့ရသူ လွှတ်တော်ကိုယ်စားလှယ်တစ်ဦး အပါအဝင် ပါတီဝင် ၁၈ ဦးရှိသည်။ထို့အပြင်
စစ်ကောင်စီက မဖမ်းဆီးဘဲ ပစ်ခတ်၊နှိပ်သတ်ဖြတ်ခံရသော NLD ပါတီဝင်မှာပိုများပြီး ၃၈ ဦးအထိ့ရှိသည်။ အမှန်တွင်မြေပြင်တွင် ယခုစာရင်းထက်ပိုများနိုင်ကြောင်းလည်း NLD-HRDT ကဆိုသည်။
မေလနောက်ပိုင်းတွင် ဘီးလင်းမြို့နယ်ပြည်သူ့လွှတ်တော်အမတ်ဦးကျော်မျိူးမင်းကိုလည်း စစ်ကောငိစီတပ်က ဇွန်လကုန်ပိုင်းတွင်ဖမ်းဆီးနှိပ်စက်သတ်ဖြတ်ခဲ့သည်။
ထို့အပြင်အာဏာသိမ်းပြီးနောက်ပိုင်း ၂၀၂၂ မေလအထိ့ဖမ်းဆီးခံ ရသောNLD ပါတီဝင် – ၉၁၇ ဦးရှိပြီးထိုထဲတွင်ပြန်လွတ်လာသူ- ၂၁၆ ဦးရှိသည်။ဖမ်းဆီးခံရသူများတွင်NLDလွှတ်တော်ကိုယ်စားလှယ် – ၁၁၉ ဦးပါဝင်ပြီးပြန်လည်လွတ်မြောက်လာသူ ၂၁ ဦးရှိကာ ဖမ်းဆီးခံနေရသောအမတ် ၉၈ ဦးရှိကျန်ရှိနေသေးသည်။
ဦးမျိုးကျော်အတွက် ဝမ်းနည်းကြောင်းနှင့် စစ်အာဏာရှင်အမြစ်ဖြတ်ရှင်းလင်းနိုင်ရေး ကြိုးစားသွားမည်ဟု ဒီချုပ်ပါတီဝင် လွှတ်တော်အမတ်များက လူမှုကွန်ရက်တွင် ရေးသားထားကြသည်။