အင်းတော်နယ်တွင် တိုက်ပွဲဖြစ်နေ၍ လမ်းပိုင်းလေးခုသွားလာခွင့်ပိတ်ပင်မည်ဟု အသိပေး

စစ်ကိုင်းတိုင်း အင်းတော်မြို့နယ်၌ တိုက်ပွဲများ ဖြစ်ပွားနေ၍ လမ်းပိုင်းလေးခုကို ယနေ့ညနေမှစ၍ ခရီးသည်တင်ယာဉ်နှင့် ကုန်တင်ယာဉ်သွားလာခွင့် ပိတ်ပင်မည်ဟု Indaw Revolution က ဖော်ပြသည်။

စစ်ကောင်စီတပ်က အင်းတော်မြို့နယ်အတွင်းသို့ စစ်အင်အားအလုံးအရင်းဖြင့် စစ်ကြောင်းထိုးနေ၍ တိုက်ပွဲဖြစ်ပွားနေသည်ဟု အသိပေးထားသည်။

ထို့ကြောင့် အင်းတော် – ကသာ၊ အင်းတော် – ဗန်းမောက်၊ အင်းတော်- ထီးချိုင့် နှင့် အင်းတော် – မော်လူး လမ်းပိုင်းများအား ယနေ့ (စက်တင်ဘာ ၂၅ရက်) ညနေ ၅နာရီမှစ၍ ခရီးသည်တင်ယာဉ်နှင့် ကုန်တင်ယာဉ်များ သွားလာခွင့်ရက်အကန့်အသတ်မရှိ ပိတ်ထားမည်ဟု ဖော်ပြထားသည်။

ပြည်သူများ ပူးပေါင်းပါဝင်ပေးကြရန် တိုက်တွန်းထားပြီး အင်တာနက်လိုင်းရသူများ ဖုန်းဖြင့်လည်းကောင်း၊ သင့်ရာနည်းဖြင့်လည်းကောင်း အချင်းချင်းဆက်သွယ်ပြီး သိပေးကြရန် နှိုးဆော် ထားသည်။

Public Service Announcement

အင်းတော်မြို့နယ်အတွင်း စစ်ကောင်စီတပ်များ လှုပ်ရှားမှု အခြေအနေကို Indaw Revolution က ယမန်နေ့တွင် ဖော်ပြထားရာ မော်လူးနှင့် နန့်စီးအောင်ကြား သံလမ်းနှင့် ကားလမ်း၌ စစ်အင်အား ၂၀၀ကျော်ဖြင့် စစ်ကြောင်းထိုးနေသည်ဟုဆိုသည်။ ထို့ပြင် နဘားရွာဘုန်းကြီးကျောင်းမှ စစ်ကောင်စီတပ်သားအင်အား ၅၀ခန့် ရွာသစ်ကုန်းသို့ တက်သွားကြောင်း၊ နားရခေါင်ရွာ ဘုန်းကြီးကျောင်းတွင်လည်း စစ်ကောင်စီအင်အား ၆၀ ကျော် ရောက်ရှိနေကြောင်း ဖော်ပြထားသည်။