ယနေ့ပစ်ခတ်မှုအတွင်း စစ်ကောင်စီတပ် လေးဦးထပ်သေဟု ကော်ဘရာအသိပေး
ကရင်အမျိုးသားအစည်းအရုံး(KNU) တပ်မဟာ(၆)နယ်မြေ မြ၀တီ – ဝေါ်လေလမ်း တောင်နီကျေးရွာအနီး ထိုးစစ်ဆင်နေသည့် စစ်ကောင်စီတပ်များကို ယနေ့ စနိုက်ပါဖြင့် ထပ်မံတိုက်ခိုက်ခဲ့ရာ စစ်ကောင်စီတပ်က လေးဦး သေဆုံးခဲ့သည်ဟု ကော်ဘရာစစ်ကြောင်းက သတင်းထုတ်ပြန်သည်။
အဆိုပါ ဒေသသို့စစ်ကြောင်းထိုးနေသည့် စစ်ကောင်စီ၏ တပ်မ(၄၄) လက်အောက်ခံ တပ်ရင်းတပ်ဖွဲ့များကို ကရင်အမျိုးသားလွတ်မြောက်ရေးတပ်မတော်(KNLA) တပ်ရင်း(၂၇) ကော်ဘရာ စစ်ကြောင်းနှင့် တပ်မဟာစစ်ကြောင်း တပ်ခွဲ(၃)က ယနေ့(စက်တင်ဘာ ၂၇ရက်) နေ့လည်ပိုင်း၌ တိုက်ခိုက်ခဲ့သည်ဟု ဆိုသည်။
ပူးပေါင်းတပ်ဖွဲ့ဘက်က စနိုက်ပါ စစ်သည်များ၏ စွမ်းရည်ဖြင့် စစ်ကောင်စီတပ်မှ လေးဦး သေဆုံးခဲ့ပြီး ပူးပေါင်းတပ်ဖွဲ့ဘက်မှ ထိခိုက်မှုမရှိကြောင်း အသိပေးထုတ်ပြန်သည်။
အဆိုပါဒေသရှိ စစ်ကောင်စီတပ်ကို ပူးပေါင်းတပ်ဖွဲ့က စနိုက်ပါ၊ ဒရုန်း၊ လက်နက်ကြီးများဖြင့် တိုက်ခိုက်မှုများ လုပ်ဆောင်လျက်ရှိရာ စနိုက်ပါစစ်သည်များ၏ လက်ချက်ကြောင့် စစ်ကောင်စီတပ်များဘက်က သေဆုံးထိခိုက်မှု နေ့စဉ်နီးပါး ဖြစ်ပေါ်နေသည်ကို ကော်ဘရာစစ်ကြောင်း၏ ထုတ်ပြန်ချက်များ၌ တွေ့ရသည်။
Public Service Announcement
စနိုက်ပါဖြင့် ပစ်ခတ်ခြင်း၊ ဒရုန်းဖြင့် တိုက်ခိုက်ခြင်းကြောင့် စစ်ကောင်စီတပ်မှ သေဆုံးမှု အခြေအနေများမှာ စက်တင်ဘာ ၂၇ရက်တွင် စစ်ကောင်စီတပ်မှ လေးဦးသေဆုံး၊ စက်တင်ဘာ ၂၆ရက်တွင် စစ်ကောင်စီတပ် သေဆုံးမှုရှိပြီး အရေအတွက် စိစစ်ဆဲဖြစ်၊ စက်တင်ဘာ ၂၅ရက်တွင် စစ်ကောင်စီတပ်မှ သုံးဦးသေဆုံး၊ စက်တင်ဘာ ၂၄ရက်တွင် နှစ်ဦးသေဆုံး၊ စက်တင်ဘာ ၂၃ရက်တွင် စစ်ကောင်စီတပ်သေဆုံးမှု စိစစ်ဆဲဖြစ်၊ စက်တင်ဘာ ၂၂ရက်တွင် ခုနစ်ဦးသေ၊ နှစ်ဦးဒဏ်ရာရ၊ စက်တင်ဘာ ၂၁ရက်တွင် စစ်ကောင်စီတပ်မှ ငါးဦးသေ၊ စက်တင်ဘာ ၂၀ရက်တွင် စစ်ကောင်စီတပ်မှ နှစ်ဦးသေဆုံးစသည့် နေ့စဉ် ထိခိုက်သေဆုံးမှုများရှိခဲ့သည်ဟု ကော်ဘရာ စစ်ကြောင်းက နေ့အလိုက် ထုတ်ပြန်ထားသည်။
