“ဘယ်သူကနိုင်ပြီး ဘယ်သူက ရှုံးမယ်ဆိုတဲ့ဟာကို အဖြေပေါ်မယ့်နှစ်ပေါ့” NUG
“ဘယ်သူကနိုင်ပြီး ဘယ်သူက ရှုံးမယ်ဆိုတဲ့ဟာကို အဖြေပေါ်မယ့်နှစ်ပေါ့” NUGအချိန်ဆွဲ သွေးခွဲ၊ လမ်းလွှဲ ဗျူဟာနှင့် နိုင်ငံရေးထွက်ပေါက်၊ စစ်ရေးအသက်ရှုပေါက်ရှာနေသည့် စစ်ကောင်စီကို အချိန်ပေး၍မရတော့ဟုပြော
စစ်အာဏာရှင်ဖြုတ်ချရေး အဆုံးသတ်တိုက်ပွဲဆင်နွှဲမည့် ကာလကိုတစ်နှစ်သတ်မှတ်ပြီး ဘက်ပေါင်းစုမှ ထိုးစစ်ဆင်သွားမည်ဖြစ်ကြောင်း အမျိုးသားညီညွတ်ရေးအစိုးရ(NUG)က ယနေ့ ညပိုင်း၌ ပြုလုပ်သည့် သတင်းစာရှင်းလင်းပွဲ၌ အသိပေးသည်။
“တော်လှန်ရေးအင်အားစုတွေရဲ့ မဟာဗျူဟာမြောက် ပေါင်းစည်းမှု အစွမ်းနဲ့အဆုံးသတ်တိုက်ပွဲ ဆင်နွှဲဖို့လည်းသံဓိဌာန်ချထားပြီးဖြစ်ပါတယ်။ အချိန်ဆွဲသွေးခွဲ၊ လမ်းလွှဲ အဲဒီဗျူဟာနဲ့ နိုင်ငံရေးထွက်ပေါက်နဲ့ စစ်ရေးအသက်ရှုပေါက်ကို ရှာဖွေနေတဲ့ အကြမ်းဖက် စစ်ကောင်စီကို အချိန်ပေးလို့ မရတော့တဲ့ အခြေအနေဖြစ်တာကြောင့် အမျိုးသားညီညွတ်ရေးအစိုးရနဲ့ မဟာမိတ်တွေ အနေနဲ့ ကဏ္ဍ စစ်မျက်နှာခြောက်ခု ဖွင့်ပြီးတော့ အရှိန်မြှင့် ထိုးစစ်ဆင်နိုင်ရေးကို တစ်နှစ် စီမံချက်ညှိနှိုင်းရေးဆွဲနေပြီပဲဖြစ်ပါတယ်”ဟု NUG သတင်းစာရှင်းလင်းပွဲ တာဝန်ရှိသူ ဦးနေဘုန်းလတ်က ပြောကြားသည်။
ပြီးခဲ့သည့်ကာလသည် လိုအပ်သည့် အခြေခံအုတ်မြစ်ကို ဖြည့်ဆည်းတည်ဆောက်ခဲ့သည့် ကာလဖြစ်ပြီး လာမည့်ကာလ၌ တော်လှန်ရေးကို အဆုံးအဖြတ်ပေးမည့် နှစ်အဖြစ်ခံယူကြောင်း ၎င်းက ဆိုသည်။
“လာမယ့်နှစ်မှာ ရန်သူကို နိုင်ငံရေး၊ စစ်ရေး၊ စီးပွားရေး၊ နိုင်ငံတကာရေး ဘက်ပေါင်းစုံကနေ ဟန်ချက်ညီညီထိုးနှက်ကာ ထိုးစစ်ဆင်မယ့်စီမံချက်ကိုလည်း ပြင်ဆင်ချမှတ်နေပြီဖြစ်ပါတယ်။ အဆိုပါ စီမံချက်ဟာ ပေးထားချက်လက်တွေ့အခြေအနေနဲ့ ဖြစ်နိုင်စွမ်းတွေကို အကောင်းဆုံးတွက်ချက် သုံးသပ်ပြီး ပြင်ဆင်ထားပါတယ်”ဟု ဦးနေဘုန်းလတ်က ပြောသည်။
Public Service Announcement
အမျိုးသားညီညွတ်ရေးအစိုးရ၏ မဟာဗျူဟာမြောက်ဆောင်ရွက်ချက်များကို အကောင် အထည်ဖော် လုပ်ဆောင်နိုင်ရန် အရေးကြီးဆုံးအင်အားသည် ပြည်သူလူထုသာဖြစ်ကြောင်း ၎င်းက ဆိုသည်။
ကလေးငယ်များကိုပင် လေယာဉ်ဖြင့် ပစ်ခတ်တိုက်ခိုက် သတ်ဖြတ်နေသည့် ရန်သူစစ်အာဏာ ရှင် အနေဖြင့် ပြည်သူလူထု၏ ဆန္ဒကို စဉ်းစားမည်မဟုတ်ဘဲ ၎င်းတို့ အာဏာတည်မြဲရေးအတွက် ဆက်သွားမည်ဖြစ်ကြောင်း ဦးနေဘုန်းလတ်က ပြောသည်။
အခက်အခဲဆုံးကာလကို ရင်ဆိုင်ရမည်ဖြစ်ပြီး အားလုံးညီညွတ်စွာ ဝိုင်းဝန်းကြိုးစားပါက ထင်သာမြင်သာသည့် အပြောင်းအလဲများ ပန်းတိုင်များကို လာမည့်နှစ်တွင် မြင်တွေ့ရမည်ဖြစ်ကြောင်း ၎င်းက ဆိုသည်။
“တစ်နှစ်တောင်စောင့်စရာမလိုတဲ့ အချိန်တွေမှာ စကားလုံးတွေနဲ့တင်မဟုတ်ဘဲ ထင်သာမြင်သာတဲ့ မြင်ကွင်းတွေ ဒါတွေမြင်ရမှာ ဖြစ်တယ်လို့ပဲ ပြောချင်ပါတယ်။”ဟု ဦးနေဘုန်းလတ်က ပြောသည်။
အာမခံနိုင်သည်မှာ လာမည့်နှစ်အတွင်း အဖြေပေါ်မည်ဖြစ်ကြောင်း ၎င်းက ဆိုသည်။
“ဘယ်သူကနိုင်ပြီး ဘယ်သူက ရှုံးမယ်ဆိုတဲ့ဟာကို အဖြေပေါ်မယ့်နှစ်ပေါ့”ဟု ဦးနေဘုန်းလတ်က သတင်းထောက်အချို့၏ မေးမြန်းမှုအပေါ် ဖြေကြားသည်။
