အကြမ်းဖက်စစ်ကောင်စီတပ်က ကလေးငယ် များအပါအဝင် ပြည်သူလူထုများအား ပစ်မှတ် ထားပြီး လေကြောင်းတိုက်ခိုက်မှုများဆက်တိုက် ပြုလုပ်နေ၍ အမျိုးသားညီညွတ်ရေးအစိုးရ (NUG)လူသားချင်းစာနာ ထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနက လေကြောင်းရန်အန္တရာယ် ကာကွယ်ရေးဆိုင် ရာ စကားဝိုင်းဆွေးနွေးပွဲတစ်ရပ် ယနေ့ ညပိုင်း၌ ပြုလုပ်မည် ဖြစ်သည်။
ကလေးငယ်များစွာအပါအဝင် ပြည်သူလူထုများ ထိခိုက်သေဆုံးခဲ့ရသည့် စစ်ကိုင်းတိုင်း ဒီပဲယင်း မြို့နယ် လက်ယက်ကုန်း စာသင်ကျောင်းတိုက်ခိုက်ခံရမှုအဖြစ်ဆိုးမျိုး မကြုံရစေရေးအတွက် ရည်ရွယ်ပြီး ယခုစကားဝိုင်းဆွေးနွေးပွဲကို ကျင်းပခြင်းဖြစ်သည်ဟု အမျိုးသားညီညွတ်ရေးအစိုးရမှ တာဝန်ရှိသူတစ်ဦးက ပြောသည်။
အဆိုပါ စကားဝိုင်းဆွေးနွေးပွဲကို “CDMများရဲ့ စေတနာအားနဲ့အတူ ဗုံးကျည်ဆံကြားက ကလေးငယ်များကို ဝိုင်းလို့ကူ”ဟု အမည်ပေးထားပြီး ယနေ့ အောက်တိုဘာ ၁၃ရက် ညနေ ၇နာရီတွင် စတင်မည် ဖြစ်သည်။
” အဓိကက လက်ယက်ကုန်းလိုမျိုးကိစ္စနောင်မဖြစ်အောင် ကလေးငယ်တွေကို လေကြောင်းရန်ကနေ ကာကွယ်ပေးနိုင်ဖို့။..။ အဲဒီအတွက် အဓိက ငွေရှာမယ့် ကမ်ပိန်းပေါ့”ဟု ၎င်းက ဆိုသည်။
Public Service Announcement
ရရှိလာသည့် ရန်ပုံငွေများကို လေကြောင်းရန် အန္တရာယ်ကြိုတင်သတိပေးသည့် စနစ်ထူထောင်ရန်၊ အသိပညာပေးလုပ်ငန်းများ လုပ်ဆောင်ရန် ဗုံးခိုကျင်းတူးပြီး လုံခြုံသည့်နေရာ ဖန်တီးရန် စသည့် လုပ်ငန်းများအတွက် အသုံးပြုသွားမည် ဖြစ်သည်။
စကားဝိုင်းဆွေးနွေးပွဲတွင် လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာန ပြည်ထောင်စုဝန်ကြီး ဒေါက်တာဝင်းမြတ်အေး၊ ပညာရေးဝန်ကြီးဌာန ဒုတိယ ဝန်ကြီး ဂျာထွယ်ပန်၊ CDM ဗိုလ်ကြီး လင်းထက် အောင်၊ ပြည်သူ့ သူရဲကောင်း CDM ဝန်ထမ်း၊ တစ်ကိုယ်တော် ပရဟိတကွန်ယက် မှ မခင်နှင်းကြည်သာ Guest Speaker အဖြစ် သရုပ်ဆောင် ချစ်သုဝေ တို့ပါဝင်မည်ဖြစ်ပြီး Moderator မှာ ဒေါက်တာဖြိုးသီဟ ဖြစ်သည်။
