ဟားခါး – ထန်တလန်ကြား တိုက်ပွဲ စစ်ကောင်စီတပ် လေကြောင်းပစ်ကူဖြင့်တိုက်ခိုက်
ဟားခါး – ထန်တလန်ကြား တိုက်ပွဲ စစ်ကောင်စီတပ် လေကြောင်းပစ်ကူဖြင့်တိုက်ခိုက်ချင်းပြည်နယ် ဟားခါးမြို့ ခရိုင်မီးသတ်ရုံးတိုက်ခိုက်ခံရပြီး မီးသတ်ကားနှစ်စီးမီးလောင် ခဲ့ပြီး ရက်ပိုင်းအတွင်း မြို့နယ်အထွေထွေအုပ်ချုပ်ရေးရုံးရှိရာ လုံခြုံရေးတင်းကြပ်ထားသည့် စုပေါင်းရုံး မီးလောင်မှု ဖြစ်ပွားခဲ့သည်ဟု The Chin Journal က ဖော်ပြထားသည်။
ယနေ့ အောက်တိုဘာ ၁၈ရက် နံနက် အစော ၂နာရီခန့်တွင် ဟားခါးမြို့ ချင်းဦးစီးရပ်ကွက်ရှိ လုံခြုံရေးတင်းကြပ်သည့်စုပေါင်းရုံးအဆောက်အအုံ မီးလောင်သွားကြောင်း၊ မြို့နယ် လ၀က၊ မြို့နယ်ပညာရေး၊ မြို့နယ်စည်ပင်၊ မြို့နယ်ကျေးလက်၊ မြို့နယ်အုပ်ချုပ်ရေးမှူးရုံး စသည့်ဟားခါးမြို့နယ်ရုံးများ တစ်နေရာတည်းတွင် စုပေါင်းရုံးထိုင်သည့်နေရာဖြစ်ပြီး နံနက်ပိုင်း ၂နာရီခန့်က သေနက်ပစ်ခတ်သံများ ထွက်ပေါ်လာပြီးနောက်ထိုသို့မီးလောင်ခြင်းဖြစ်ကြောင်းဒေသခံ၏ ပြောကြားချက်ကို ကိုးကားဖော်ပြထားသည်။
မီးလောင်မှုကြောင့် မြို့နယ်ထွေအုပ်ရုံးခန်းနှင့်မြို့နယ် စည်ပင်ရုံးခန်း မီးလောင်သွားသည်ဟု စုပေါင်းရုံးဝန်ထမ်းများနှင့်နီးစပ်သည့်ဟားခါးဒေသခံ၏ပြောကြားချက်ကိုဖော်ပြထားသည်။
ပြီးခဲ့သည့်အောက်တိုဘာ ၁၅ရက် နံနက်အစော ၄နာရီခန့်ကလည်း ဟားခါးမြို့ ဟားခါးထာရ်ရပ်ကွက်ရှိ စစ်ကောင်စီတပ်သားများ တပ်ဆွဲထားသည့် ဟားခါးခရိုင်မီးသတ်ရုံးတိုက်ခိုက်ခံရပြီး မီးသတ်ကား ၂စီး မီးလောင်သွားခဲ့သည်။
Public Service Announcement
ယခုရက်ပိုင်းအတွင်းဟားခါးမြို့တွင်းနှင့်ဟားခါး-ထန်တလန်အကြားတွင် တိုက်ပွဲများ မကြာခဏ ဖြစ်ပွားလျက်ရှိသည်။
အောက်တိုဘာ ၁၆ရက် နံနက်က ဟားခါးမြို့ ၀န်ကြီးအိမ်ယာဘက်တွင်တိုက်ပွဲဖြစ်ပွားခဲ့ရာ စစ်ကောင်စီတပ်ကလက်နက်ကြီး ပစ်ကူပေးသကဲ့သို့စစ်ကားနှစ်စီးဖြင့်စစ်ကူစေလွှတ်ခဲသည်ဟု ဆိုသည်။
အောက်တိုဘာ ၁၇ရက်တွင် ဖြစ်ပွားသော ဟားခါး-ထန်တလန်အကြား တိုက်ပွဲ၌လည်း စစ်ကောင်စီတပ်ကတိုက်လေယာဉ်ဖြင့် ၂ခေါက် ဗုံးကြဲတိုက်ခိုက်ခဲ့သည်ဟု The Chin Journal က ဖော်ပြထားသည်။
အဆိုပါဒေသ၌ ချင်းအမျိုးသားတပ်မတော်(CNA) နှင့် ချင်းဒေသကာကွယ်ရေးတပ်(CDF) ပူးပေါင်းအဖွဲ့ကစစ်ကောင်စီတပ်ကို တိုက်ခိုက်လျက်ရှိသည်။
