စစ်ကိုင်းတိုင်း၊ ဘုတလင်မြို့နယ်ရှိ မကျီးအုပ်ကျေးရွာကို စစ်ကောင်စီတပ်က လက်နက်ကြီး၊လက်နက်ငယ်များဖြင့် ဝင်ရောက်ပစ်ခတ်ခဲ့၍ ဒေသခံအမျိုးသမီးတစ်ဦးသေဆုံးကာ သားအမိသုံးဦးဒဏ်ရာရရှိခဲ့ကြောင်း ဒေသတွင်းသတင်းရင်းမြစ်များက ပြောသည်။
ယနေ့ (အောက်တိုဘာ ၂၅ ရက်) နံနက် ၅နာရီခန့်က ဘုတလင်မြို့နယ်၊ မကျီးအုပ်ကျေးရွာကို စစ်ကောင်စီတပ်များက လက်နက်ကြီးများဖြင့် ပစ်ခတ်ခဲ့ရာ သားအမိသုံးဦး ဒဏ်ရာရရှိခဲ့ကြောင်း၊ ထို့နောက် ကျေးရွာအတွင်းသို့ ပစ်ခတ်ဝင်ရောက်ခဲ့ရာ အမျိုးသမီးတစ်ဦး ကျည်ထိမှန်သေဆုံးခဲ့ကြောင်း ဘုတလင်မြို့နယ်သတင်းမှန်ပြန်ကြားရေးအဖွဲ့ ပြန်ကြားရေးတာဝန်ခံက ပြောသည်။
ထို့အပြင် ပြည်သူ့ကာကွယ်ရေးတပ်ဖွဲ့ဝင် ရဲဘော်တစ်ဦးလည်း ကျဆုံးခဲ့သည်ဟုဆိုပြီး သတင်းထွက်ပေါ်သော်လည်း ထပ်မံအတည်ပြုနိုင်ခြင်း မရှိသေးပေ။
“ဘုတလင်ကနေပေါက်ဆိန်ပေါက်ရွာဘက်ကနေ ဝင်တာလို့သိရပါတယ်။ ပြည်သူ့ရဲဘော်တစ်ဦးကျတာနဲ့ပတ်သက်ပြီး ဘာကြောင့်ဆိုတာ မသိရသေးပါဘူးဗျ။”ဟု ပြန်ကြားရေးတာဝန်ခံက ပြောသည်။
Public Service Announcement
Myanmar Defense Force အဖွဲ့ ပြန်ကြားရေးတာဝန်ခံက လည်း”အဲဘက် စခန်းစီးခံရတယ် သတင်းကြားမိတယ်ဗျ။ ကျွန်တော်တို့ဘက်ကဆို အရှေ့ဘက်ကျမယ်ဗျ။”ဟု ပြောသည်။
အဆိုပါ စစ်ကောင်စီတပ်သည် နံနက် ၁၀ နာရီဝန်းကျင်တွင် ပြန်လည်ထွက်ခွာသွားကြောင်း သိရသည်။
ပြီးခဲ့သည့် အောက်တိုဘာ ၁၅ ရက်နံနက်ပိုင်းကလည်း MDF -ဘုတလင်တပ်ခွဲ၏ ကင်းတဲတစ်ခုအား စစ်ကောင်စီတပ်က အလစ်ဝင်ရောက်တိုက်ခိုက်ခဲ့၍ ရဲဘော်နှစ်ဦး ကျဆုံးခဲ့သေးသည်။
