မကွေးအခြေစိုက် စစ်ကောင်စီ၏ လေတပ်ကို တော်လှန်ရေးတပ်ဖွဲ့များက ယနေ့နံနက်တွင် ရှော့တိုက်ဒုံးဖြင့် ပစ်ခတ်တိုက်ခိုက်ခဲ့သည်ဟု မကွေးတိုင်းရှိ ပြည်သူ့ကာကွယ်ရေးတပ်(PDF)များနှင့် နီးစပ်သည့် ဒေသခံတစ်ဦးက ပြောသည်။
“မကွေးလေတပ်ကို မနက်က ၆နာရီလောက်က ရှော့တိုက်ဒုံးနဲ့ ၃ခါလောက် ပစ်တာ။ ပစ်တော့ သူတို့အရင်တခါ ကလည်း ရှော့တိုက်ဒုံးနဲ့ မကွေးလေတပ်ကို ပစ်ဖူးတယ်လေ။ ပစ်ဖူးတော့ သပြေစမ်းဆိုတဲ့ရွာနားက ယာခင်းထဲက သဲလွန်စတွေ ဘတ္ထရီအိုးတို့ ဘာတို့ အဲဒါတွေတွေ့ခဲ့တာကိုး။ တွေ့ခဲ့တော့ ဒီနေ့လည်း အဲဒီရွာကို သူတို့တစ်ရွာလုံး ပိုက်စိပ်တိုက်ရှာတယ်ပြောတယ်”ဟု ဒေသခံက ပြောသည်။
ထိုသို့ တိုက်ခိုက်ခံရမှုကြောင့် မကွေးလေတပ်အတွင်း ဆောင်ရွက်နေသည့် တည်ဆောက်ရေးလုပ်ငန်းမှ အလုပ်သမားများကို လေတပ်အတွင်း ဝင်ခွင့်မပြုဟု သိရသည်ဟု ၎င်းက ဆိုသည်။
“ဒီလိုပစ်လိုက်တဲ့အတွက် အထိအခိုက်အပျက်အစီးကတော့ ကျွန်တော်တို့ မသိရဘူး။ မကြားရသေးဘူးပေါ့။ ပစ်တာတော့ သုံးချက်ပစ်တာ။ မကွေး ယူဂျီအဖွဲ့တွေ သုံးဖွဲ့လောက်ပေါင်းပြီးလှုပ်ရှားတယ် ပြောတာပဲ”ဟု ဒေသခံက ပြောသည်။
Public Service Announcement
မကွေးလေတပ်စခန်းတွင် ၂၀၂၂ ဩဂုတ်အတွင်းက ပေါက်ကွဲမှု ဖြစ်ပွားခဲ့ပြီး ဧပြီအတွင်းကလည်း ရှော့တိုက်ဒုံးဖြင့် ပစ်ခတ်တိုက်ခိုက်ခံခဲ့ရသည်။အဆိုပါဖြစ်စဉ်များ၌ လေယာဉ်နှင့် လေယာဉ်ရုံ အဆောက်အဦတို့ ထိခိုက်မှုရှိခဲ့သည်ဟု သတင်းများထွက်ပေါ်ခဲ့သည်။
