စစ်ကိုင်းတိုင်း၊ စစ်ကိုင်းမြို့နယ်၊ စဥ့်ကိုင်ကျေးရွာကို စစ်ကောင်စီတပ်က ယနေ့ညနေပိုင်းတွင် ဝင်ရောက်မီးရှို့ဖျက်ဆီးသွားပြီး မင်းဝံတောင်ရိုးတကြောရှိ ကျေးရွာများမှ ဒေသခံပြည်သူထောင်ချီထွက်ပြေးနေရ၍ အခက်အခဲများကြုံတွေ့နေရကြောင်း ဒေသခံများက ပြောသည်။
ဝက်လက်နယ်နှင့်စစ်ကိုင်းနယ်အရှေ့ခြမ်း၌ စစ်ကြောင်းထိုးဖျက်ဆီးနေသော စစ်ကောင်စီတပ်သည် ယနေ့ နိုဝင်ဘာလ ၁၇ ရက်နေ့ညနေပိုင်းတွင် စစ်ကိုင်းမြို့နယ်၊စဉ့်ကိုင်ရွာသို့ အင်အား၂၀၀ ခန့်ဖြင့် ပစ်ခတ်ဝင်ရောက်ကာ နေအိမ်များအား မီးရှို့ဖျက်ဆီးသွားကြောင်း ဒေသခံများက ပြောသည်။
စဥ့်ကိုင်ကျေးရွာသည် အိမ်ခြေ ၁၄၀ခန့်ရှိပြီး ရွာသူရွာသားများထွက်ပြေးခဲ့ရသဖြင့် ဆုံးရှုံးမှုအခြေအနေ မသိရသေးကြောင်း၊ စဥ့်ကိုင်ကျေးရွာအပြင် စစ်ကိုင်းမင်းဝံတောင်ရိုးတစ်လျှောက်ရှိကျေးရွာများ ထွက်ပြေးတိမ်းရှောင်နေရကြောင်း ဒေသခံများက ပြောသည်။
“စဥ့်ကိုင် တောင်ရွာ မြောက်ရွာ နှစ်ခုလုံး စခ များမီးရှို့သွားတယ် ဒီနေ့ညနေက။ စဥ့်ကိုင်ရွာအပြင် ပြေးရတဲ့ရွာ ဆယ်ရွာကျော်တယ်။ လူဦးရေထောင်ချီထွက်ပြေးနေရတယ်။ လိုအပ်တာတွေ အရမ်းများနေတယ်။”ဟု ဒေသခံတစ်ဦးက ပြောသည်။
Public Service Announcement
လက်ရှိတွင် စစ်ကောင်စီတပ်သည် တလိုင်းရွာတွင်တပ်စွဲထားကြောင်း ဒေသခံများက ပြောသည်။
နိုဝင်ဘာ ဒုတိယပတ်အတွင်းက စစ်ကိုင်းနှင့်ဝက်လက်မြို့နယ်အရှေ့ခြမ်းသို့ စစ်ကြောင်းထိုးမီးရှို့ဖျက်ဆီးမှုများပြုလုပ်နေသော စစ်ကောင်စီတပ်နှင့် ဒေသကာကွယ်ရေးအဖွဲ့များလည်း မကြာခဏထိတွေ့တိုက်ပွဲများဖြစ်ပွားလျက်ရှိသည်။
စစ်ကောင်စီတပ်သည် နိုဝင်ဘာ၁၃ ရက်က ဝက်လက်မြို့နယ် ထန်းကြီးကျေးရွာနေ ဒေသခံပြည်သူလေးဦးအား မီးရှို့သတ်ဖြတ်သွားပြီး နေအိမ်ပေါင်း ၃၈၀ခန့်လည်း မီးရှို့ဖျက်ဆီးသွားခဲ့သည်။ ထို့အပြင် ထွက်မပြေးနိုင်သည့် မသန်စွမ်းတစ်ဦးလည်း မီးလောင်သေဆုံးခဲ့သည်။
