ဆိုင်းတောင်စစ်ကောင်စီတပ်စခန်းကိုလည်း KIA ဗုံးခွဲတိုက်ခိုက်
ကချင်ပြည်နယ် ဖားကန့်မြို့နယ်တွင် စစ်ကောင်စီတပ်ဖွဲ့ဝင်များ လိုက်ပါလာသည့် ယာဉ်တစ်စီးကို ယမန်နေ့က မိုင်းခွဲတိုက်ခိုက်ခဲ့ရာ စစ်ကောင်စီတပ်မှ သေဆုံးထိခိုက်မှုရှိခဲ့သည်ဟု ကချင်လွတ်လပ်ရေးတပ်မတော်(KIA) သတင်းပြန်ကြားရေးက ဖော်ပြသည်။
KIA အမှတ်(၉)တပ်မဟာ၊ အမှတ်(၆) တပ်ရင်းနယ်မြေ ဆိုင်းတောင်အနီး စဘော့မှော်တွင် နိုဝင်ဘာ ၂၃ရက် နေ့လယ် ၁နာရီခန့်က စစ်ကောင်စီတပ်ယာဉ်ကို KIA တပ်က မိုင်းဆွဲတိုက်ခိုက်ခဲ့ခြင်းဖြစ်သည်ဟု ဆိုသည်။
စစ်ကောင်စီတပ် ခမရ (၁၁၁)မှ အင်အား ရှစ်ဦးပါအဖွဲ့သည် ကားတစ်စီးဖြင့် စဘော့မှော် ကျေးရွာအနီး လှုပ်ရှားလာစဉ် မိုင်းဆွဲတိုက်ခိုက်ခဲ့ခြင်းဖြစ်ပြီး အဆိုပါ တိုက်ခိုက်မှုကြောင့် စစ်ကောင်စီတပ်သား တစ်ဦး သေဆုံးပြီး ငါးဦး ထိခိုက်ဒဏ်ရာ ပြင်းထန်စွာရရှိခဲ့သည်ဟု ဖော်ပြထားသည်။ အဆိုပါ ကားလည်း ပျက်စီးသွားသည်ဟု ဆိုသည်။
ထိုသို့ တိုက်ခိုက်ခံရခြင်းကြောင့် စစ်ကောင်စီတပ်မှ လက်နက်ကြီးများဖြင့် ပစ်ခတ်ခဲ့ကြောင်း ဖော်ပြသည်။
စစ်ကောင်စီတပ်၏ ခမရ (၁၁၁)က စဘော့မှော်ကျေးရွာအနီး စစ်ရေးလှုပ်ရှားနေခြင်းကြောင့် တိုက်ပွဲများ ဖြစ်ပွားလာနိုင်ကြောင်း KIA က အသိပေးထားသည်။
နိုဝင်ဘာ ၂၂ရက်ည ၁၀နာရီခွဲခန့်ကလည်း ဖားကန့်မြို့နယ် ဆိုင်းတောင်ရွာအတွင်းရှိ စစ်ကောင်စီတပ်စခန်းကို KIAက ဗုံးခွဲတိုက်ခိုက်ခဲ့ရာ စစ်ကောင်စီတပ်ဘက်က ထိခိုက်မှုရှိနိုင်သည်ဟု KIA သတင်းပြန်ကြားရေးဌာနက ဖော်ပြသည်။