▪︎ပြည်သူ့ကားများဖြတ်နေ၍ ပြန်လည်ဆုတ်ခွာခဲ့ရဟုဆို
စစ်ကိုင်းတိုင်း၊ စစ်ကိုင်းမြို့နယ်၊ ညောင်ပင်ဝန်းကျေးရွာရှိ ရဲစခန်းအား လက်နက်ကြီးလက်နက်ငယ်များဖြင့် ပစ်ခတ်တိုက်ခိုက်ခဲ့ကြောင်း မြင်းမူအခြေစိုက် GTR MMU အဖွဲ့က သတင်းထုတ်ပြန်သည်။
ယမန်နေ့ (နိုဝင်ဘာလ ၂၇ရက်) ညနေပိုင်းကစစ်ကိုင်းမြို့နယ်၊ မုံရွာ-မန္တလေးလမ်းမကြီးပေါ်ရှိညောင်ပင်ဝန်းရဲစခန်းအား လက်နက်ကြီး၊လက်နက်ငယ်များဖြင့်ဝိုင်းပစ်ကာ တိုက်ခိုက်ခဲ့ကြောင်းအသိပေးထားသည်။
အပြန်အလှန်ပစ်ခက်မှုများရှိခဲ့ပြီး ပြည်သူ့ကားများ တိုက်ပွဲကြား ဖြတ်သန်းနေခြင်းကြောင့် ဆုတ်ခွာခဲ့ရကြောင်း GTR MMU အဖွဲ့ကဆိုသည်။
ဖြစ်စဥ်နှင့်ပတ်သက်၍ GTR MMU အဖွဲ့ထံ ဆက်သွယ်မေးမြန်းထားပြီးပြန်လည်ဖြေကြားခြင်း မရှိသေးပေ။
ဒေသခံတစ်ဦးက”ပစ်ခက်သံတချို့လည်းကြားရတယ်။ လက်နက်ကြီးသံတွေပါ ကြားခဲ့ရတယ်။ ညနေ ၆ နာရီလောက်မှာ ပစ်ခတ်သံတွေငြိမ်သွားတယ်။”ပြောသည်။
မဟာမိတ်အဖွဲ့ ရဲဘော်များ အထိအခိုက်မရှိ ဆုတ်ခွာနိုင်ခဲ့ကြောင်း၊ ထိုစစ်ဆင်ရေးကို စစ်ကိုင်းခရိုင်တပ်ရင်း၂ တပ်ခွဲ ၂ (GTR MMU, MMDF) ၊ စစ်ကိုင်းခရိုင်တပ်ရင်း ၂ တပ်ခွဲ၄ ( တိုက်နယ်စွန် )၊ မြင်းခြံခရိုင် တပ်ရင်း ၆ ဒေသခံမဟာမိတ်အဖွဲ့များ တို့က ပူးပေါင်းတိုက်ခိုက်ခဲ့ကြောင်းအသိပေးထားသည်။
ယမန်နေ့နံနက် ၇ နာရီဝန်းကျင်က ညောင်ပင်ဝန်းကျေးရွာအပါအဝင် စစ်ကိုင်းမြို့နယ်အတွင်းရှိ လက်ပံသာရွာ၊ ထိန်ကုန်းရွာ၊ မောင်းထောင်ရွာ၊ မအူပင်၊ သဖန်းသာ များသို့ စစ်ကောင်စီ စစ်ကြောင်းထိုးလာ၍ ပြည်သူများထွက်ပြေးတိမ်းရှောင်ခဲ့ရကြောင်း စစ်ကိုင်းမြို့နယ် သတင်းမှန်ပြန်ကြားရေးက ပြောသည်။
စစ်ကောင်စီတပ်သည် မောင်းထောင်ရွာသားတစ်ဦးပိုင်ဆိုင်သည့် သခွားခင်းရှိ တဲများကိုမီးရှို့သွားခဲ့သည်။
ညနေ ၅ နာရီခန့်တွင် မောင်းထောင်ကျေးရွာ၊ ရွာသစ်ကျေးရွာ၊ မြိုင်လယ်ကျေးရွာများသို့စစ်ကောင်စီစစ်ကြောင်းရောက်ရှိလာ၍ ကျေးရွာမှ ပြည်သူများ ထွက်ပြေးတိမ်းရှောင်ခဲ့ရကြောင်း ဒေသခံများက ပြောသည်။